Karkeranê ke nîsbetê zemî yê Şaredarîya Çewlîgî ya AKPyî qebul nêkerd, bira grevî girewtbî. Hemvervatoxanê HDPyî yê Meclîsê Şaredarîya Çewlîgî Ferhat Yildirim û Canan Baraçî derheqê babete de eşkerayîyêke daye.

Eşkerayîye de ame vîrvistene ke karkeran bi 377 reyan bira grevî girewta û eke mabênê şaredarîye û karkeran de pêkerdiş nêbo karkerî mengêke ra dima do dest pê grevî bikerê.

Hemvervatoxan vat: ''Welat de enflasyon est o la nîsbetê zemî yo ke pêşkêşê karkeran ameyo kerdene, têna tewirê AKPyî yê vera şarî eşkera keno. Şaredarîya AKPyî herinda ke heqê karkeran bida kena ke merdimî binê vêşanîye de biciwîyê. No ne exlaqî ne zî wijdanî yo. Rixmo ke nê karkerî pabesteyê 3 sendîkayan ê, heqê nê sendîkayan çin o ke peymanêke virazê. Reyna nê sendîkayan qetî paştî nêdaya karkeran.

Ma sey HDPyî destpêkî ra nata proses teqîb kerd û tim hetê karkeran de vindertî. Xûlasa karkerê şaredarîye hetê patron û sendîkayan ra terkê qederî bîyê. Karkerê ke bi serran o hetê fîrmayanê taşeronan ra yenê kolonyalkerdene pê statuyo ke hetê AKPyî ra ronîyayo, 'qaşo' ameyî bikadrokerdene. La bi rayîrê nê statuyê neweyî zî heqê karkeran yeno werdene.

Şaredarîya Çewlîgî de karkeran tewr peyêne 1979 de wexto ke şirîkê AKPyî îqtîdar de bibi, grev kerdbi. Hişmendîya ê çaxî hetê nê îqtîdarî ra 43 serran ra dima newe ra eşkera bîye.

Ganî cade mabênê terefan de pêkerdiş bêro peydakerdene, karkerî nêrê mexdûrkerdene. Ma venga Şaredarê Çewlîgî danê ke wa mesuldarîya xo bîyaro ca.''