Qerarê hukmî yo ke derheqê Wekîlê HDPyî yê Kocaelî Omer Faruk Gergerliogluyî ame qetikerdene Heyetê Pêroyî yê Meclîsî de ame wendene. Bi wendişê qerarî wekîlîya Gergerlîogluyî diyaye wardayene.

Wekîlanê HDPyî çalakîya roniştîşî daye destpêkerdene

Gergerlîoglu badê wendişê qerarî Heyetê Pêroyî ra nêvejîya. Partîyanê muxalefetî ra xeylêk wekîlan paştî daye Gergerlîogluyî û ê zî nêvejîyayî teber. Serekwekîlê Meclîsî Celal Aydninî waşt ke wa Gergerlîoglu vejîyo teber. Wekîlanê HDPyî û yê muxalefetî yê bînan vera nayî nêrazîbîyayîş ramojna. Dima ra AKP û MHPyî Heyetê Pêroyî caverda. Wekîlanê HDPyî semedê protestokerdişê qererî tîya dest pê çalakîya roniştişî kerde. Nayî ser o meclîsî roniştiş hewteyê bînî rê pey de eşt. HDPyîjan fotografê Gergerlîogluyî û pankartê ke ser o gureyê muhîmê ke ey kedî nuşte bî kiriştî.

Sancar: No operasyono sîyasî yo

Hemserekê Pêroyî yê HDPyî Mîthat Sancar gama ke ame Heyetê Pêroyî dovîzo ke serê ci de Gergerlîoglu esto kursîyê Meclîsî de na ro. Sancarî wardayîşê wekîlîya Gergerlîogluyî sey operasyonê sîyasîyî name kerd kerd û vat: ''No darbeyê vera demokrasîyî yo, darbeyê vera Meclîsî yo. Ma do vera nê hêrişan sareberz rayîrê xo rê dewam bikerê.''

Dima ra Serekwekîlanê Grûba HDPyî Merale Daniş Beştaş û Saruhan Oluçî derheqê babete de eşekerayîya çapemenîye daye.

Oluç: Şima do hesabê na bêhuqûqîye bidê

Oluçî nê vat: ''Heyetê mehkeme huqûq binpay kerd û goreyê qanûnan nê goreyê Qesre qerar girewt. Ma nayî çirey qebul nêkenê û ma veng danê dozger û dageranê ke hema biney wîjdan zanayîşê înan ê huqûqî esto wa verê îqtîdarî de milê xo çewt nêkerê. Eke îqtîdar bibedilîyo şima do hesabê nayî bidê. Ma do çirey verê qeraranê şima yê bêhuqûqan de milê xo çewt nêkerê. Peynî ra tewr peynî ma do hesabê na bêhuqûqîye ke şima kenê şima ra bipersê. Şima mecburê ke goreyê madeyê 90. yê destnêpanayîşî yê qanûnê bingeyî têbigêrê. Şima nêeşkenê keso ke pê îradayê şarî ameyo vîjnayene goreyê xo ci rê nêzdî bê û ci rê bîat bidê kerdene. Ma verê na bêhuqûqîye de milê xo çewt nêkenê. Senî ke qerarê Enis Berberogluyî peyser ame açarnayene wekîlîya Gergerlîoglu zî do newe ra bêro îadekerdene.''

Beştaşe: Gergelîoglu wekîlê şarî yo do tim wina bimano

Beştaşe zî vera qerarî hersê xo ard ziwan û vat: ''Ewro wekîlîya Gergerlîogluyî dîyaye war. Seba ke ey xeberêka seba haştîye pare kere cezaya hepsî dîyaye ci. Seba ke haştîye waşte ame cezakerdene. Xebera ke pare kerde hema sîteyê ke pare kerda ûca de vindena. Wekîlîya 11 wekîlanê ma dîyaye war. Nê demî de zî Leyla Guven, Musa Farisogullari û nika zî Omer Faruk Gergerlîoglu pîya bi înan hûmare bîye 14. Gergerlîoglu ke pawitoxê heqan o wekîlê şarî yo û  do tim wina bimano. Seba ke raştîyan ano ziwan û meselayanê şarî ano rojdem hetê îqtîdarî ra yeno waştene ke verê ci bêro girewtene. Ma nayî qebul nêkenê. Ma sey HDPyî do çirey haştîye, demokrasî û edaletî ra peyser gamê nêerzê.''