HDP: Ma do destûrê xeyma provokatoran medê

HDPyî da zanayene ke provokatorêkî vato ke do verê Merkezê Pêroyî yê HDPyî de xeyma xo rone û vat ê do çirey destûrê ci medê.

Heyetê Rayberdişî yê Merkezê HDPyî derheqê Mehmet Laçîno ke vato do Îzmîrî ra bêro verê Merkezê Pêroyî yê HDPyî de xeyma xo rone de eşkerayîye daye û vat ê do destûrê provokasyonan medê.

Eşkerayîye de qetilkerdişê Denîze Poyraz ke Îzmîr de pê destê hukmatî ame kerdene, ame vîrardene û nê  ameyî vatene: ''Di serran ra zafêr o ke pê propagandaya leymine ya îqtîdarî û destê asayîşî verê bananê ma yê partîye de provokasyonî yenê kerdene. Nê provokasyonan ra yewî zî Îzmîr de verê qetilkerdişê Denîze Poyraz akerd. Îqtîdaro ke meşruyetê xo yê komelkî vînî kerdo bi xapînayîşê şarî verê hêrişê vera partîya ma amede keno. Nê hêrişî têna partîya ma rê nê vera demokrasîyî yenê kerdene. Îqtîdar bi hêrişan berpirsîyarîya xo nimneno.

Yew şexso ke verê banê ma yê Îzmîrî de yeno vindarneyene û engişta ci qetilkerdişê embaza ma Denîze Poyraz de esta nika zî şawîyeno verê ma banê ma yê merkezî. Êyê ke ey şawenê peyê hêrişanê pîlan de yê. Wa îtîfaqê AKP-MHPyî yo ke hêrişê partîya ma keno bizano ke na xeyma ke pê destê asayîşî yena organîzekerdene ma do testûrê ci medê.

Hêrişê vera partîya ma têkoşînê demokratîkî yê Tirkîya hedef genê. Semedê pawitişê demokrasîyî û haştîye ma veng danê ke wa heme şarê ma vera nê tezgahî de vindero û zafêr paştî bido HDPyî.''