Hetkarê Hemserekanê HDPyî yê Komîsyonê Heqanê Merdiman û Huqûqî ra Berpirsîyar Umît Dedeyî derheqê dewaya Onur Gencero ke Denîze Poyraz qetil kerdbî de merkezê partî de kombîyayîşê çapemenîye kerd.

Dedeyî da zanayene ke waştişê kiştox Onur Gencerî ser o yeno xîterkerdene ke dewa bêra berdene bi Kayserî. Dedeyî vat: ''Dewayanê bînan ê qirkerdişî de zî seba ke ceza nêra dayene kiştoxan dewayî ameyî remnayene cayêkê bînî. Seba ke no qirkerdiş û peyê ci bêrê mîyankerdene yeno waştene ke dewa bêra remnayene Kayserî. Keyeyê Poyrazî, partîya ma, avûkatî û rêxistinê komelê sivîlî edaletî ra ber çîyêk nêwazenê. Kiştoxî seba ke ma nêeşkê dewa teqîb bikerê çîyo winasên waşto. Ma do derheqê babete de xîretanê xo bizêdînê û meverdê ke dewa bêra remnayene.''

Dedeyî dima bale ante bira Mehkemeya Heqanê Merdiman a Ewropa (MHME) ser û vat: ''MHME zî bire daye ke wedarnayîşê heqê destpanêdayîşî yê wekîlanê ma binpaykerdişêk o. Ganî bira MHME bêra caardene û embazê ma bêrê veradayene.''