Hemvervatoxê Komîsyonê Teqîbê Xerîtaya Rayîrî yê Kurdkî Salîm Kaplanî vat HDP 21ê Sibate Roja Ziwanê Dayîke ya Dinya (ewro) de mîyanê xo de seferberîya musayîşê kurdkî dano destpêkerdene.

HDPyî par seba ke kurdkî biba ziwanê perwerdeyî û hetê qanûnê bingeyî ra bişinasîya xerîtaya rayîrî amade kerdbi.

Komîsyonê Teqîbê Xerîtaya Rayîrî ya Kurdkî do eba ke kurdkî zêdê bişuxilîya ewro dest pê perwerdeyê kurdkî (kirdkî-kirdaskî) bikero. Verî Hemserekî Mîthat Sancar û Pervîne Buldan, Meclîsê Partî, Heyetê Rayberdişî yo Merkezî, Meclîsê Cinîyan, hemserekê qeza û şaristanan, îdarekarî û wekîlî zî tede 200 kesî do perwerdeyê bi kurdkî bigêrê. Dersî bi kirdkî û kirdaskî verî 4 astan de bêrê dayene.

 Hemvervatoxê Komîsyonê Teqîbê Xerîtaya Rayîrî yê Kurdkî Salîm Kaplanî derheqê babete de Ajansê Mezopomya rê qisey kerd.

Kaplanî bale ante polîtîkaya asîmîlasyonî ser û vat: ''Wextê ronayîşê Tirkîya ra vera kurdkî polîtîkaya çînkerdişî yena rayraberdene la Îqtîdarê AKPyî  na polîtîka zafêr xorî kerde. TRT-6 û unîversîteyan de tay beşî kerdî a la nê semedê pawitişî ziwanî nê semedê asîmîlasyonî akerdî. Unîvesîteyan de semedê musayîşê kurdkî nê seba ke kurdkî zafêr asîmîle bibo polîtîkayî yenê reyraberdene. Kurdkî ganî bibo ziwanê perwerdeyî.''

Kaplanî pare kerd ke ronayîşê HDPyî ra nata ê vera polîtîkaya teda ya serê ziwanî têkoşîn kenê û vat: ''Seba ke kurdkî biba ziwanê kurdkî ma waştişê xo rayaumûmîye reyde pare kerdbi. La mabênê nê xebatanê ma û vilabîyayîşê kurdkî de eqsîtîye estbî. Ma na babete de zaf rexneyî girewtî, kêmasîyê ma estbî. Nika komîsyonê ma de 10 kesî estî înan ra 2 tenî MYK, kesêk PM, 4 tenî wekîl û 4 tenî zî şewirmend ê. Komîsyonê ma do perwerde bibo, seba ke kurdkî biba ziwano fermî xebatan bikero. Ma do na babete de xebatanê dîplomasî bikerê û dezgeh û komeleyan reyde têbigêrê.''

Kaplanî bale ante polîtîkayanê asîmîlasyonî yê vera kurdkî ser û vat: ''Îqtîdarê AKP-MHPyî nê xebatî zêdînayî. Semedo ke bi kurdkî qisey kerdêne nê welatî de merdimî kişîyenê. Ma do vera polîtîkayanê asîmîlasyonî têkoşîn bikerê û wayîrê ziwanê xo vejîyê.'' 

Hetê bînî ra Vervatoxa HDPyî Ebru Gunaya ke vizêr eşkerayîya çapemenîye de rojedem ercna bi wesîleya 21ê Sibate Roja Ziwanê Dayîke kurdkî derheqê muhîmaya ziwane dayîkê de qisey kerd.

Gunaye bi ziwanê xo yê dayîke kirdkî(zazakî) mesajê wayîrvejîyayîşê ziwanê dayîke da.