Vervatoxa HDPyî Ebru Gunay merkezê pêroyî yê partîya xo de kombîyayîşê çapemenîye kerd û rojdem ercna.

Qiseykerdişê Gunaye ra beşêk wina yo:

''Ez Jîna Emînî yad kena. Sere de Jîna Emînî û cinîyan ê kurdan pêro cinîyanê ke hê xo ver danê selam kena ke sloganê 'Cinîye, Cuye, Azadîye' kerd sloganê seserra 21. Rejîmê Îranî cinîyêka 22 serre seba ke gijikê ci asayêne qetil kerde. No tewiro hêrişker û faşîzan têna tewirê rejîmê Îranî nê tewirê faşîzanan o. Cinîyê Rojhelat û Îranî bi rojan o vera qetilkerdişê Jîna Emînî waran de yê. Sere de Rojhelatê Kurdîstanî û Tehran de xeylêk welatan de cinîyî wazenê wa mergê Jîna Emînî bêro roşnîkerdene û sûcdarî bêrê eşkerakerdene. Seke Tirkîya de qewimîyeno her serre cinîyî seba nasnameyê xo, kincanê xo û gijikê xo yenê qetilkerdene. Cinîyê Rojhelat û Îranî zî hînî vanê bes o! Ma sey HDPyo ke partîya cinîyan a, qetilkerdişê Jîna şermezar kenê û vanê ke qetilkerdişê her cinîye seba ma sebebê serewedaritişî yo.

Ma kişîyayîşê cinîyan qetî qebul nêkenê. Ma paştî danê serewedaritişê cinîyan o ke Tehranî ra heta Rojhelatî berz beno, serewedaritişê ma yo. Sey Meclîsê Cinîyan ê HDPyî ma her ca de do bibê vengê têkoşînê nê cinîyan. No têkoşîn têkoşînê azadîye yo hempar o. Ma nê mezgê dişmenê cinîyan hol şinasnenê û her roje vînenê. Ma sey cinîyan vera temamîya îdeolojîyanê dişmenê cinîyan ê, vera sîstemê serdestîya camêrdan ê. Ma do hesabê qirkerdişê cinîyan bipersê. Ma her ca de sloganê 'Cinîye, Cuye, Azadîye' berd bikerê, veng bidê têkoşînê cinîyanê Rojhelat û Îranî. Ma xoverdayîş û çalakîyanê înan selam kenê.''