Bîn şewe vera banê HDPyî yê qezaya Yuregîrî ya Adana hêrişo biçeke û bimolotofî ame kerdene. Rêxsitina Bajarî ya Adana hêriş protesto kerd. Çalakîya ke Parka Înonuyî de ameye kerdene wekîlê HDPyî û xeylêk  partîyê sîyasîyî û rêxitinê komelê sîvîlî tewrê ci bîyî.

Verê eşkerayîye polîsan dormeyê banê HDPyî girewt, dekewtiş û vejîyayîşî qefilnayî. Kesanê ke waşt pê zorî debikewê parke raştê hêrişê polîsan ameyî. Çalakwanan pê sloganan vera hêrişan nêrazîbîyayîşê xo ard ziwan.

Hemserekê HDPyî yê Yuregîrî Durmaz Ozmenî vat: ''Ma do pê nê kayan mexapîyê. Her guleyo ke vera HDPyî yeno eştene, her molotof  erzîyeno haştîye, azadîye û wayûbiratîya şaran ê welatê ma.''

wekîla HDPyî ya Adana Tulaye Hatimogullari zî vera astenkerdişê polîsan hersê xo ard ziwan û bale ante paştdayîşê patîyanê sîyasîyan û dezgehanê komelê sîvîlî yê cîya cîyayan ser. Hatimogullari vat: '' No paştdayîş do welatî nê îqtîdarî ra bixelisno.''

Wekîlê HDPyî yê Adana Kemal Pekozî bale ante polîtîkaya hêrişkare ya îqtîdarî ser û vat: '' Ê tersê xo ra wina kenê la se kenê wa bikerê ma do înan ra bixelisê.''

Reyna bi nameyê ÎHD û CHPyî zî qiseykerdişî ameyî kerdene û hêrişê vera HDPyî sey hêrişê vera şaranê Tirkîya ameyî hesibnayene.