HDP: Qirkerdişê Reyhanli netîceya polîtîkayanê AKPyî ya

HDPyî pare kerd ke Qirkerdişê Reyhanli bedelanê polîtîkaya şerî ya AKPyî ra yew o û qurbanê qirkerdişî yad kerdî.

Hetkara Hemserekan ê Pêroyîyan ê HDPyî ya Komîsyonê Şar û Bawerîyan ra Berpirsîyare Tulaye Hatîmogullar, bi wesîleya serrgêra 8. ya Qirkerdişê Reyhanli eşkerayîyêke daye.

Eşkerayîye bi kilmî wina ya: ''Ma no dej xo vîr a nêkerd û do nêkerê ke tede 53 merdimî ameyî qetilkerdene û 155 merdimî zî birîndar bîyî. Qirkerdişê Reyhanli bedelanê polîtîkaya şerî ya AKPyî ra yew o ke şaranê herême rê ame ferzkerdene. Reyhanli qirkerdişêko winasên bi ke sey senatyoyêk ame caardene. Têna Reyhanli nê dima ke El Nûsra û DAÎŞî Tirkîya de kar kerd Qirkerdişê Gar, Pirsûs û Dîlokî zî kerdî. Îqtîdarî zî hemkarîya nê rêxistînan ê tarîyan kerde. Mesuldarê sîyasî yê nê qirkerdişî nêameyî muhakemekerdene. Ma vera nê polîtîkayanê tarîyan û şerî ganî pê şîarê 'haştîye û wayûbiratîye' paştdayîş xurt bikerê. HDP do têkoşînê wayûbiratîya şaran û têdûştîye rê dewam bikero.''