Partîya Demokratîke ya Şaran (HDP) derheqê hêrişê vera karkeran ê kurdan yo ke Sakarya de ame kerdene de merkezê xo yê pêroyî de eşkerayîya çapemenîye  daye. Hetkara Hemserakanê HDPyî ya Komîsyonê Kede ra Berpirsîyare Şazîye Kose û endamê komîsyonî tewrê kombîyayîşî bîyî.

Kose vat: ''Rîyê ziwanê axuyin ê îqîtdarî ra û polîtîkayanê ci ra kulturê lînçkerdişî aver şino. Verî zî hendê hêrişê vera karakran ê kurdan ameyî kerdene ke ma nêeşkenê yew bi yew bihûmarê. Rîyê polîtîkaya îqtîdarî ra krîz xorî bena û her tim sere de kurdî, kedkar û koçberî fegê topan de yê û tim hurdî yenê vînayene. Kesê ke şîdetê vera cinîyan de sînor nasnêkene paskulan erzenê cinîyan. Reyna hîrê meymunî ameyî kay kerdene. Ma nêdî, nêeşnawit û nêzanê. La dîmenê ke medyaya sosyale de vila bîyî û vatişê kesanê ke raştê hêrişî ameyî tam akse naye vano. Vera polîtîkaya AKPyî ke şaran verdana pê, kena dişmenê yewbînan ma polîtîkaya têhetameyîşî rayra benê. Ma nê hêrişî şermezar kenê û veng danê ke wa cade derheqê hêrişakran de tehqîqat bêro destpêkerdene. Ma do karkerê ke raştê hêrişî ameyî zîyaret bikerê û  derheqê prosesê hukmî de  qisey bikerê.''