Varvatoxa Partîye ya HDPyî Ebru Gunay merkezê pêroyî de bi kombîyayîşê çapemenîye netîcenameyê Konferansê Pîlî yê 4. eşkera kerd.

Gunaye vat: ''Ma bi şîarê 'Xoverdayîşo Pîl, Rayraşîyayîşo Pîl' 6-7ê hezîrane de bi tewrbîyayîşê 600 delegeyan Konferansê xo yo Pîl ê 4. kerd. Ma konferans de ercnayîşê rexne û xorexnekerdişî kerdî. Hewcedarîyê polîtîk û rêxistinkîyî yê dewrê verê ma girewtî dest û ma hêna bi qerardarîye ramojna ke ma eşkenê herinda nê rejîmê fasîtî de sîstemê demokratîkî awan bikerê.  Ma qerarê pîlkerdişê îtîfaqê demokrasîyî girewt û qerarê Konferansê Cinîyan ê 4. tesdîq kerdî.

Destkewteyê ke Rojawan de kurdan serkêşîya cînîyan de fînayî dest zorê hêzanê herême û serdestan şinê. Rojhelatê Mîyanînî de cuya demokratîke bi paştdayîşê PDKyî û destê îqtîdarê AKP-MHPyî yena hedefgirewtene. Îqtîdaro ke her roje zafêr hêz vînî keno polîtîkayanê xo yê hêrişî zêdîneno. Zîndan de binpaykerdiş heqan zafêr bîyî. Vera nê xoverdayîşê kurdan û tepişteyanê sîyasîyan dewam keno.

Cinîyî zî vera zextanê sîstemê nêrî têkoşînê xurtî danê. Kedkar û karkerî semedê heqanê xo xover danê. Têgêrayîşê ekolojîkî vengê xo berz kenê. Nêrazîbîyayîşê komelkîyê  zêdîyenê. Muxalefetê mîyanê sîstemî nêeşkeno nînan ro bibo cewab. Çunkê hêzê muxaletê zereyê sîstemî zî paştî danê polîtîkayanê şerî ye îqtîdarî. Semedê ameyoxê demokratîkî yê şaran tek çare bedilnayîşê demokratîk û radîkal ê sîstemî yo. Çare Rayîrê Hîrêyin o.

Sebebêkê krîzanê Tirkîya zî Sîstemê Hukmatê Serekkomarîye yo. Herinda nê de ganî sîstemo demokratîk bêro awankerdene. No zî pê Îtîfaqê Demokrasîyî bono. Şarê Tirkîya ne Îtîfaqê Cuhmurî rê ne zî muxalefeto ke sey îqtîdarî yo rê mecbûr nîyê. Coka ma wazenê bi sîyasetê xo yê raryîrê hîrêyinî Îtîfaqê Demokrasîyî pîl bikerê. Îqtîdar pê polîtîkayan şerî keno ke qîrayîşê vêşanîye wa mero eşnawitene. Ma qerardar ê ke vera feqîrîye û bêadeletîye ma şaran pîya bi keda înan bikerê azad.

îqtîdar bi paştdayîşê NATO û hêzanê mîyanneteweyî û PDKyî hêrişê operasyonê teberê sînorî keno. Hêrişê Rojawan û Başûrê Kurdîstanî keno. Ma na polîtîkaya leyminê şermezar kernê û vera şer û îşxalî haştîye pawenê û qerardar ê ke îtîfaqê haştîye pîlêr bikerê. Îqtîdar dîşmenîya vera kurdan zafêr kerde. Semedê polîtîkayanê şer û pêkewtişan kerdo xo çeng. Meseleya kurdî ganî pê muzakere û dîyalogî bêro çareserkerdene. HDP do semedê çareserî çîyo ke destê ci ra bêro bikero. Birêz Ocalano ke vano ez do na mesele hewteyêk de eşkena çareser bikerî 23 serrî yo binê tecrîdê giranî de yo. Tecrîdê Îmraliyî verê çareserî de astengo tewr pîl o. Tecrîd eynî wextî de heqê haştîye û hêvîya heme şaranê Tirkîya zî xesp keno.Ganî cade bêrê Îmraliyî bêrê akerdene.

Ma qezencanê tarîxîyan ê cinîyan hemserekîye û temsîlkarîya secîye zî Pêkerdişê Îstanbulî zî canêverdenê. Ma tarîxî ra zanê ke xoverdayîşê ciwanan û şaran tim vera şeran est o. Ciwanî zî rayraşîyayîşê HDPyî de cayê xo genê. Dewaya qefilnayîşî ya vera partîya ma, qeyûmî, dewaya Kobanê û tepiştiş û destbendkerdişî têna vera HDPyî nîyê, nê zextî fîkrîyatê têkoşînê hemparî hedef gênê.HDP têna adresê muxalefetê jîhatî nîyo. Eynî wextî hêzê çareserî yo yê Tirkîya yo.  HDP partîya elewî, cinî, ekolojîst û heme şaranê bindestan a. Nê hetê komelkî rixmê heme kayan çirey bêçare nîyê. Ma bi çoşê pîlî ver bi Kongreya Pîle ya 4.  rayra şinê. Kam/e ke wazeno hêvî û têkoşînî pîl bikero wa bêro tewrê nê rayraşîyayîşê biheybetî bibo.''