Partîya Şaran a Demokratîke (HDP) seba ke ziwanê Kurdkî aver şore dest bi kampanyaya ziwanê dayîke kerde.

Gama verên a kampanya zî na ya ke Nobetê Demokrasîyî yê ke verba tayînkerdişê qeyûman yenê viraştene  do bibê kursîyê ziwanê dayîke.  Komîsyonê Ziwanî yê Kongraya Cimatî ya Demokratîke (KCD, Partîya Herêmanê Demokratîkan (DBP) û Platformê Ziwanê Kurdkî do paşt bidê kampanya. HDP'yo ke kampanya  kirişeno çalakîyanê nobete, çalakîyan de do bi hewayêkê sembolîkî dersanê Kurdkî bido.

Qiseykerdoxê Platformê Ziwanê Kurdkî Şerefxan Cizirî behsa kampanya ya HDP'yî kerde û bale ante ke Nobeta Demokrasîyî de destpêkerdişê kampanyayêk zaf girîng o û ganî Ziwanê Kurdkî her hetê cuye de bêro xebitnayene. Cizirî va:‘‘ Kurdkî ganî sey ziwanê propaganda nêro xebitnayene û seba ke aver şêro ganî her wareyî de xebatî bêrê kerdene. Ganî ma ziwanê Kurdkî her ca de bidê naskerdene. Na nêna a mena ke ma verba ziwananê bînan ê. Pêro ziwanî wa bêrê qiseykerdene la ma Kurd ê û ma ganî heqê xo yê qiseykerdişê Kurdkî bişuxulnê."