HDP’yî dest bi xebata qanûnê bingeyênî yê demokratîkî kerd. Do sazîyanê sivîl ê cimatkîyan dir, grûbanê bawerîye û organîzasyonanê cinîyan dir bicemêyo. Seba ke zîndanî bêrê vengkerdene zî do seferberî bido destpêkerdene.
Heyetê Îdareyî yê Merkezê HDP’yî û Meclîsê Partîye vizêr merkezê HDP’yî de bi serekîya hemserekê pêroyîyî Sezaî Temellîyî cemêya. Kombîyayîş de qerarê destpêkerdişê hemleya ‚Qanûno Bingeyên o Demokratîk‘ ame dayene. Kombîyayîş de serê seferberîya organîzebîyayî de û qanûnê bingeyênî yê demokratîkî de ame vindertene û Awbendê Hesenkeyfî û problemê zîndanan ameyî munaqeşekerdene.
Goreyê xebera ajansê MA bi serkêşîya serekwekîlê Meclîsê HDP’yî Mîthat Sancarî seba xebatanê qanûnê bingeyênî yê demokratîkî grûbêk amîya awankerdene. HDP do cimatî dir zî kombîyayîşan virazo. Do sazîyanê sivîl ê cimatkîyan dir, grûbanê bawerîye û organîzasyonanê cinîyan dir bicemêyo
13’ê Temmuze de Hesenkeyf de
Kombîyayîşanê HDP’yî de serê qirkerdişanê ekolojîye de zî ame vindertene. Awbendê Hesenkeyfî û qirkerdişê daristanê ODTU ame rojdem û qerarê mucadeleyî ame dayene. Parlementeranê HDP’yî seba ke Hesenkeyf binê awe de memano do 13‘ê Temmuze de waştişanê xo ûca bîyarê ziwan.
‚Ganî Ma Zîndanan Veng Kerê‘
Kombîyayîş de serê zextanê zîndanan û bicaardişanê hemverê huqûqî de zî ame vindertene. HDP’yî seba ke zîndanî bêrê vengkerdene û bicaardişê nêhuqûqîyî bêrê qedînayene, do paştî bido însîyatîfanê sivîlan û bi hawayêkê aktîfî tewrê xebatanê înan bibo.
Kombîyayîş de ame vatene ke bi kombîyayîşanê herêman, xebatanê kongre, komxebat û xebatanê perwerdeyî do seferberîya organîzebîyayî bêro dewamkerdene.
