Vervatoxa HDPyî Ebru Gunay merkezê partîye ci de kombîyayîşê çapemenîye kerd û detayê Programê Têkoşînê Demokratîkî pare kerdî.

Guna bale ante ser ke vera hêrişanê îqtîdarî parîya înan pîlêr bîya û vat: ''Programê ma vera hêrişanê vervejîyayîşêko xurt o. Ma pê nê programê çalakîyan darbe û tasfîye yê îqtîdarî yê vera sîyasetê demokratîkî, red kenê. Bi nê programî waştişê ma oyo ke têkoşîno hempar bêro xurtkerdene. HDPyî ra tersenê coka wina hêriş kenê. Zanê ke partîya ma eşkena îqtîdarê înan bido war. Xora pratîkê naye tewr rind 7ê hezîrane de  înan dî.''

Gunaye derheqê programî de nê vatî: ''Programê ma semedê hîrê aşman o û merhealeya verêne do eşmêke bikero derg. Merhaleya verêne de  Amed, Idîr, Qers, Êlîh  û Sêrtî  zîyaretkerdişî û pêvînayîşî ameyî kerdene. Merhaleyê diyîne de do  15-20ê hezîrane de Rayraşîyayîşê Demokrasîyî yê Vera Darbe bêro kerdene. Rayraşîyayîş do Colemêrg û Edirne ra di qolan ra bêro desptêkerdene û Anqara de bêro qedînayene. Edirne de do verê zîndano ke Hemserekê Pêroyî yê Partîya ma yo verên Selahattin Demirtaş tede sey rehîn yeno tepiştene de bêro destpêkerdene ke bale bêro antene serê tepişteyanê sîyasîyan. Colemêrg zî ame tercîhkerdene ke bale bêro antene serê çareserkerdişê demokratîkî yê meseleya kurdî ser.Qolê Colemêrgî Wan, Amed û Adana ser ra, ê Edirne zî Îstanbulî  ser ra do bireso Anqara û rayîr de do pêvînayîşî bêrê kerdene û têhetameyîşî bêrê organîzekerdene. Seba çalakîyan tedbîrê vera janî zî ameyî girewene. ''

Gunaye wina dewam kerd: ''Rayraşîyayîşê ma yê demokrasî, azadî, haştîye û edaletî yo. No progremê xoverdayîşî yê vera her tewirê polîtîkaya hêriş, darbe, tasfîye û îmhayî yo. Ma heta ewro çirey vera darbeyanê Tirkîya bêveng nêmendî, bi darbekeran pêsere nêkerd û damê înan a nêkewtî.  Îradeyê şarî xeta sûre ya famê ma yê sîyasîyî ya û ma naye çewe/î rê nêdane eciqnayene.  Eke hole nêameyo famkerdene ma heyna vajê HDP bi darbekeran pênêkeno vera înan têkoşîn keno. Darbekerî her ca de hêrişê şarê ma kenê, dişmenîya vera kurdan de sînor nasnêkenê. Ma zî do vera nînan çirey mabên medê têkoşînî û heta serkewtiş xover bidê.''