HDPyî dişmenîya dewleta tirke ya vera kurdan ser o raporêk amade kerd. Rapor hetê Hetkarê Hemserekanê HDPyî yê Komîsyonê Heqanê Merdiman ra Berpirsîyar Umît Dede û Wekîlê HDPyî ya Anqara Fîlîze Kerestecîoglu ra pê kombîyayîşêkê çapemenîye ame wendene.

Rapor de qala polîtîkayanê dewlete yê vera kurdan yena kerdene ke menganê peyênan de ameyî caardene.

Raporî ra çend tesbîtî wina yê:

-Kurd û muxalîfî hema zî benê hedef

-Îqtîdarê AKPyî vera janî nê vera muxalîfan têkoşîn kerd.

-Dest nîya 14 şaredarîyanê HDPyî ser û herinda hemşaredaran de qeyûm ame tayînkerdene.

-Kampanyaya HDPyî ya paştdayîş û hetkarîye ameye krîmînalîzekerdene.

-84 kesan rê kerdişê xirabî û îşkence ameyî kerdene.

-387 kesî ameyî destbendkerdene, 93 kesî ameyî tepiştene.

-13 goristan ameyî rijnayene, 282 cenazara  kişta rayîrî de ameyî definkerdene.

-Zîndanan de maske, awa germe, madeyê werdî û mazlemeyê hîjyenî nêdîyayî.

-Sere de tepişteyê sîyasîyî bi se hezaran tepişteyî terkê mergî bîyî.

-Tewr tay 70 cinîyî hetê mêrdeyanê xo ra kişîyayî.

-93 fezlekeyî amade bîyî û înan ra 84 fezlekeyî seba HDPyî bîyî.

-Warê sivîlan dîyayî bombayan ver, têna 10 rojan de 9 sivîlî kişîyayî.

Umît Dedeyî kombîyayîşê çapemenîye de qisey kerd û îfade kerd ke wextê janî de îşkence û kerdişê xirabî zêdîyayî, qedexeyê vejîyayîşê teberî seba polîs û nobetdaran sey bahaneya teda û şîdetî ame xebitnayene û operasyonanê îşxalî zî dewam kerd. Ame parekerdene ke 387 merdimî prosesê janî de bi hawayêkê nehuqûqî ameyî destbendkerdene înan ra 93 kesî ameyî tepiştene. Umît Dedeyî ard ziwan ke AKPyî tepişteyan rê teda kerde, zîraretê avûkat û keyeyan bi temamî wedarîyayî, tepişteyan rê kitab û rojnameyî nêdîyayî, tepişteyê nêweşî nêameyî weşkerdene. 

Umît Dedeyî vat: ''Rojnameger, wendekar, avûkatê heqanê merdiman, tepişteyê ke 65î ra pîlêr ê, tepişteyê nêweşî, cinîyê bi domanan û sîyasetmedarê kurdî bîyî hedefê cîyakerîya pîle Prosesê janî de 3 tepişteyê nêweşî nêveradayîyayî coka merdî. Bi seyan tepişteyî pê vîrusê Korona kewtî.''

Eşkerayîye de zî nê çîyî ameyî vatene: ''Prosesê janî de îqtîdarî polîtîkaya xo ya şerî dewam kerde. Herêmanê kurdan de qedexeyê vejîyayîşê teberî, vêşnayîşê daran, astengkerdişê çêrnayîşê heywanan, kiştişê heywanan, sereeştişê keyeyan, îşkence zêdîyayî.''

Eşkerayîye de hêrişê vera Başûrê Kurdîstanî zî ameyî vîrvistene: ''Vera Herêma Kurdîstanî operasyonê leşkerî dest pêkerd û warê sivîlan dîyayî bombayan ver. Mabênê 17 û 27ê hezîrane de tewr tay 9 sivîlî herême de kişîyayî.''

Fîlîze Kerestecîoglu zî pare kerd ke ê parekerdişê nê binpaykerdişan girîng vînenê û vat: ''Seba awankerdişê welatêkê demokratîk, têdûşt, azad û haştîyane sey vizêr ewro zî hêvîya ma esta.''