Wekîlanê HDPyî Feleknase Uca, Murat Çepnî, Hasan Ozguneş û Huda Kaya sey heyetêkî Şingal zîyaret kerdbi. Zîyaretî ra dima merkezê partîye de kombîyayîşê çapemenîye kerd û raporê xo eşkera kerd.

Rapor bi kilmî wina yo:

''Têkoşînê Tirkîya yê bi DAÎŞî zûrêka pîl a. DAÎŞ tewr zaf Tirkîya ra paştî gêno. Tirkîya wazena pê destê DAÎŞî destkewteyanê kurdan çin bikera. Peymana 9ê Teşrîna Verêne ra dima hêrişê vera Şingalî zêdîyayî.

Ma sey heyetê HDPyî 8-12ê sibate de şîyî Şingal û Mexmûrî ke hetê Tirkîya ra dîyabî bombayan ver. Ma tesbît kerd ke têkoşînê Tirkîya yê bi DAÎŞî zûrêka pîl a. DAÎŞ tewr zaf Tirkîya ra paştî gêno. Tirkîya wazena pê destê DAÎŞî destkewteyanê kurdan çin bikera. DAÎŞ reyna amadekarîya hêrişan leno. DAÎŞî hêrişê Zîndanê Hesekê kerd û 121 hemwelatîyê Rojawanî kiştî. Nê hêrişî verê çimanê hêzanê mîyanneteweyîyan, Tirkîya, Iraq û Sûrîye de ameyî kerdene.

3ê tebaxa 2014î de Şingal de DAÎŞî qirkerdişêko pîl kerdbi. Hema zî Şingal de xeylêk goristanê komkî estê. 9ê teşrîna verêne ya 2020î de mabênê Bexdad û Erbîkî de pê paştdayîşê Neteweyanê Yewbîyayeyan, Amerîka û Tirkîya de Peymana Şingalî ameye îmzakerdene. Na peymane ra dima hêrişê vera Şingalî zêdîyayî.

Nika Şingal de 200 hezar kesî ciwîyenê, tay kesî zî kampanê PDKyî de ciwîyenê. Bi temamî 13 kampî estê. Vera Şingalî polîtîkaya asîmîlasyonî esta. Zîyaret de ma rê ame vatene ke nameyê MÎTî ser o şarê Şingalî rê telefonî yenê kerdene û ajanîye şarê Şingalî rê yena ferzkerdene.

Serra peyêne de xeylêk reyî vera Şingalî hêrişê hewayî ameyî kerdene û nê hêrişam de sivîlî ameyî qetilkerdene. Şingalî ser o gefê DAÎŞ û Tirkîya estê. Şarê Şingalî wazeno ke serê înan de drone û teyarayî megêrê û wa pêro dewletî qirkerdişê êzidîyan qebul bikerê.

Mexmûr

Heyetê ma şi Kampa Mexmûrî ke binê mesuldarîya Neteweyanê Yewbîyayeyan de ya. Kampa Mexmûrî hînî bîya warê merdiman. Kampe de qasê 13 hezar merdimî ciwîyenê. 2018 ra nata şar nêeşkeno şoro şaristananê bînan ê Herêma Kurdîstanî. Îdareyê Herêma Kurdîstanî kampe ser o ambargo keno. Wendekarê kampe nêeşkenê şorê zanîngehan.

Wexto ke DAÎŞ hêrişê kampe keno şar pê îmkananê xo, xo paweno. Tirkîya zî hewayî ra hêrişê kampe kena. Cayê ke Tirkîya vana 'Ma da bendê terorîstan ro' cayê sivîlan ê. Şarê Mexmûrî wazeno bombardumanî biqedê, ambargo û qedexeyê bêrê wedaritene û wendkarî bieşkê şorê zanîngehan.''