Merkezê Pêroyî yê HDPyî derheqê DEDAŞî de ke Riha, Amed, Mêrdîn, Êlih, Sêrt û Şirnex de şarî rê zulm keno raporêk amade kerd.

Rapor de ame vatene ke seba ke DEDAŞ vaya ceyranî xeylêk zêdînaye hemwelatîyî nêeşkenê heqê faturayan bidê. Bale ameye antene ser ke herêmê ke ceyranê DEDAŞî xebitnenê goreyê herêmanê bînan 10 qat zêdêr heqê fatura danê.

Rapor de nê çîyî ameyî îfadekerdene:

-Birnayîşê ceyranî şertanê weşîye rê tesîr kenê. Birnayîşê ceyranî ra pêsayîşê awe zî qewimîyeno û heywanî telef benê. 

-Hetkarîya madî ya ke hetê Wezaretê Zîretî ra dîyena rencberan hetê DEDAŞî ra cade banka ra yena girewtene. Rencberî nêeşkenî zîret bikerê.

-Kurdîstan de hema trafoyê kahanî estê ke benê sebebê cînayetanê karî. Kêmasîya awanîya binge ra zî ceyran nêdîyeno tay keyeyan.

HDPyî raporê xo de da zanayene ke DEDAŞ ganî nê tewirê xo ra fek vera bido û tay çareserîyî pêşkêş kerdî. Çareserîyî wina yê:

-Hetkarîya madî ya seba rencberan ganî şîrketan rê nêra dayene û blokeyê hesabanê rencberan bêro wedaritene.

-Deynê rencberan hetê dewlete ra bêro dayene.

-Ganî heyeto xoser DEDAŞ de cigêrayîş bikero û raporêk amade bikero.

-Ganî faturayî mengane ney bi dewirkî bêrê girewtene.

-Trafo û awanîya bingeyî ya ceyranî ya herême wa bêrê newekerdene.