Wekîlanê HDPyî  semedê betalkerdişê bedilnayîşê qanûnê înfazî yê cîyakerî muracatê Mehkemeya Qanûnê Bingeyî kerd û çalakîya nobete kerde.

Hetkarê Hemserekanê HDPyî yê Huqûqî û Heqanê Merdiman ra Berpirsîyar Umît Dede, Serekwekîla Koma HDPyî Merale Daniş Beştaş zî tede grûba Meclîsê HDPyî pîya bi xeylêk avûkatan ameyî verê Mehkemeya Qanûnê Bingeyîyan. HDPyîjanê ke yelegê ke ser de 'Semedê her kesî edelat' nuşte bi dayî xo ra hema ke nêameyî bî polîsan Parka Ahlatbel Ataturkî de cayê xo girewt. Polîsan barîkatî nayî ro û nêverda kesêk vejîyo teber. HDPyî parke de eşkerayîye daye.

Umît Dedeyî vat: ''Bedilnayîşê qerarê qanûnî goreyê qanûnê bigeyî nîyo û ganî bêro betalkerdene. Zîndanê Tirkîya de tarîxî ra tim û tim binpaykerdişê heqan estê. Îqtîdarê AKP-MHPyî qaçîno vano ê şertanê tepişteyan kenê holêr la çi heyf ke rewşa tepişteyan xirabêr kerda. Roja verêne ra ma vera nayî yê. Tepişteyê sîyasîyî û edlîyî ameyî cîyakerdene. Extîyarê ke 65 serran ra cor ê û grûba rîskî de tehlîye nêkerdî la rayberê çeteyan ameyî veradayene. Hetê bînî ra heme heqê tepişteyan ameyî binpaykerdene. Bitaybetî zî bi nuqtaya tewr girane zî bedilnayîê madeyanê 36. û 89î yo. Goreyê nayî heyetê çimdarî yê îdareyî ke memûrê îqîtdarî tede ca genê tepişteyanê sîyasîyan kontrol kenê û derehqê înan de qerar danê. Goreyê nê heyetan tepişteyê sîyasîyî seba ke halê înan o hol çîn o veradayîşê bişertî û serbestîya bikontrolîye ra meherum yenê veradayene.  Ma vajê tepişteyê ko 20 serrî yo zîndan de eşkeno pê veradayîşê bişertî vejîyo la pê qerarê nê heyetî 6 serran zafer zîndan de yeno tepiştene. Mehkemeya Qanûnê Bingeyî mesuldarê cuya tepişteyan o. Xora şima zana sebebo bînî yê grevê vêşanîye zî tecrîdê serê birês Abdullah Ocalanî yo. 2020 de avûkatanê birêz Ocalanî 19 reyî muracatê Mehkemeya Qanûnê Bingeyî kerd. Işkenceyê Îmraliyî raporê CPTyî de zî ame tesdîqkerdene. Seba ke ma semedê grevê vêşanîye qerqilîyenê ma wazenê ke wa muracatê derheqê brêz Ocalanî bêrê dest girewtene û bêhueqûqîye biqedîyo. Ma Mehkemeya Qanûnê Bingeyî wazenê ke wa waştişê tepişteyan bêrê ca.''

Meral Daniş Beşdaş zî çalakîya înan sey çalakîya verêne ya kampayaya 'Semedê her kesî edalet' name kerd û vat: ''Destê ma de qerarê Mehkemeya Heqanê Merdiman a Ewropa yê derheqê Demîrtaşî de estê. Reyna qerarê derheqê birêz Ocalanî de estê. Vernîyazê CPTyî estê. Mehkemeya Qanûnê Bingeyî herina caardişê înan de goreyê îqtîdarî têgêrana. Ewro 84 mîlyonê mexdurê Mehkemeya Qanûnê Bingeyî û bêhuqûqîye yê.''

Endamê Komîsyonê Huqûqî yê HDPyî semedê teqdîmkerdişê waştişnameyê muracatî şîyî Mehkemeya Qanûnê Bingeyî. Wekîlanê HDPyî zî dest pê çalakîye kerde.

Hemserekanê Pêroyî yê HDPyî  Pervîne Buldan û Mîthat Sancarî çalakîye de sîyasetmedarî zîyaret  kerdî.

Sancarî vat: ''Bêedaletîya tewr pîle kurdan yena kerdene. Heqê kurdan yenê binpaykerdene û temsîlkarê ci tim raştê bêedaletîye yenê.''

Buldane vat:  ''Qetilkar û tecawuzkarî yenê tehlîyekerdene la êyê ke haştîye û demokrasî wazenê zîndan de yê. Edalet do rojêke şima rê zî lazim bo.''

Badê qiseykerdişan çalakîye qedîyaye.