Endama Grup Yorumî Helîne Boleka ke roja 288ine ya rojeyê mergî yo ke vera zextê dewlete rayra berdene de dinyaya xo bedilnaye  bi merasîmêk ameye yadkerdene.

Merasîm cayê xoverdayîşê Boleke Kuçuk Armutlu de ameye organîzekerdene. Heskerdoxê Grup Yorumî, şarê taxe û merdimê Boleke tewrê merasîmî bîyî. Cenazaya Boleke ya ke bi vilikan ameye xemilnayene keyeyê xoverdayîşî ra hetê cinîyan ra ameye kiriştene. Maya Boleke Aygul Bilgî û mayanê TAYADijan ê ke vernîya kortejî de ca girewt qemtê sipî antê xo û pê bendê sûrî pîştî. Mersîmo ke bostanê Cemxaneyî de ame kerdene de deyîra Grup Yorumî ''Ma rê merg çîn o'' yew fekî ra ameye vetene û sloganê ''Hêlîne Bolek bêmerg a'' û ''Wa biciwîyo xoverdayîşê ma yê rojeyê mergî'' ameyî eştene.

Endamê Grup Yorumî Ibrahim Gokçeko ke rojeyê mergî de yo pê sandalîyê bigogerî tewrê merasîmî bi û hemraya xo ra xatir waşt. Gokçeko ke tîya qiseykerdişêk kerd vat: ''Se beno wa bibo ma do ser bikewê û konseranê xo de deyîranê xo reyna vajê.'' Gokçekî vist vîrî ke waştişê înan dewam kenê û vat: ''Şima do Mustafa Koçak û endamanê Grup Yorumî veradê. Şima ma bîlasebeb kerdî  lîsteyan. Şima ganî senî nê hesabî bidê, şima nêeşkenê nê hesabî bidê. '' Gokçekî veng da ke wa xoverdayîş bêro girdkerdene û vat: ''Ma serkewtişî pîya dest bifînê. Ma pêro pîya xo ver bidê, serbikewê û serkewtişê xo fîraz bikerê. Ez şima bi germayîya deyîranê ma silam kena.''

Endama Grup Yorumî Sehere Adiguzel zî ard ziwan ke Hêlîne heta hela peyêne xo ver da û heskerdişê xo yê şarê xo vînî nêkerd û vat: ''1996 de Ayçe Idil veyva şarê ma bî, nika Hêlîne bîye veyva şarê ma. Ma soz danê Hêlîne ke ma do ser bikewê.''