Endama Komîteya Merkezî ya PKKyî Hêlîne Umît bernameyê taybetî yê Medya Haber TVyî de bira binpaykerdişî ya Komîteya Wezîran a Konseya Ewropa ercnaye.

Qiseykerdişê Hêlîne Umît ra tay noqtayê girîngî wina yê:

''Rayber Apo Îmrali de xoverdayîşêkê tarîxîyî keno.9ê teşrîna verêne ya 1998î 26 serrî xo pey de verdayî. Şarê kurdî bi serkêşîya partîya ma her ca de nê 26 serran de mîyanê çalakîyan de bi. Hema zî wina yo. Şarê ma vera Komployê Mîyanneteweyî, vera hêzanê komplogeran û sîstemê Îmraliyî bi hêrsê pîlî çalakîyanê xo rê dewam keno.

Têgêrayîşê cinîyan, Têgêrayîşê Azadîye yê Cinîyan ê Kurdan zî 26 serrî yo mîyanê xîretan de yê. Çar paçeyanê Kurdîstanî, zîndanan, koyan û kuçeyan de û Ewropa de qirkerdişê Îmraliyî yeno teşhîrkerdene. Nika pêro dinya vera Îmraliyî payan ser de ya. Cuya ke Riha de dest pêkerdbî ewro vurîyaya raştîyê xoverdayîşê globalî. 

Seke zanîyeno 69 wayîranê Xelata Nobelî, 1500 avûkatanê Ewropa eşkerayîye daye û azadîya Rayberîya ma waşte. Bingeyê azadîya Rayber Apoyî de, vera sîstemê qirkerdişî yê Îmraliyî raştîyêka winayêne ya pawitişî vejîyaye werte. Vingeyê Rayberîye de çarçewa huqûqî ya winayêne ameye afernayene ke raştîya Kurdîstanî ana ziwan, heqê kurdan pawena û kewena mîyanê xîretan.

Komployî armanc kerdêne ke Têgêrayîşê Azadîye yê Kurdan tasfîye bikero, Rayber Apoyî Îmrali de bêtesîr bikero û xoverdayîşê kurdan werte ra wedarno. La 26 serran de xoverdayîş û têkoşînê ma û şarê ma pîlêr bîyî.

Ganî nê hetî ra ma bira Komîteya Wezîran a Konseya Ewropa biercnê. Xoverdayîşê winayênî ra nêbîyêne netîceyêka winayêne zî nêbîyêne. Eke Konseya Ewropa neçare menda ke eşkerayîye bida sebebê ney ganî bêrê dîyene.

Seke KCK û KJKyî eşkerayîyanê xo de îfade kerdbî bira Konseya Ewropa dewamê bêhuqûqîya Îmraliyî yo. Mehkemeya Heqanê Merdiman a Ewropa 2014 de birêke girewtbî û vatbi ke ganî heqê hêvîye bêro şinasnayene. 10 serrî vîyartî. La Konseya Ewropa ancî seba caardişê nê heqî wext dayo Tirkîya. 

Na bire îdeolojîk û sîyasî ya û eleqeyê ci bi huqûqî çin o. Ganî ma na bire qetî qebul nêkerê û vera ci nêrazîbîyayîşê xo bi xurtî bîyarê ziwan. Ma zanenê ke hêzê kapîtalîstî û hêzê rojawanijî (Ewropa) ancî destê xo danê Rojhelatê Mîyanênî. La nê îdeolojîya Rayber Apoyî ra tersenê. Hêzê mîyanneteweyî seba ke herême parçe bikerê nêzdîyê kurdan benê. Nê hêzî wazenê ke Şerê Dinya yê Hîrêyînî de zî kurdî sey xo bimanê. La Rayber Apo azadîya şaran, cuyêka alternatîfe temsîl keno.

Vera na bira Komîteya Wezîran û nê kerdişan ganî ma têkoşînê xo biresnê astêka tewr berxe. Hinî çew nêeşkeno estbîyayîşê kurdan înkar bikero. Dostê ma est ê, kurdî rêxistinkerde yê û muxatabê dewletan ê. Ganî ma na raştîye bizanê û goreyê ci têbigêrê. 

Ganî ma verê dezgehanê Ewropa de tedaya xo zafêr bikerê. Ma muhakemekerdişê Rayber Apoyî zî ganî qebul nêkerê. Ameyoxê şarêkî, estbîyayîşê şarêkî û serkêşê şarêkî do senî mehkemeyanê tirkan de bêro muhakemekerdene? Pawitişo meşrû, xopawitiş, şerê estbîyayîşî heq ê. 

Nê esasî ser o sere de cinî û ciwanê Kurdîstanî ma venga pêro şarê Kurdîstanî, merdimanê wayîrrûmetan, demokratîkan danê ke seba caardişê azadîya Rayber Apoyî bixebitê. 

Serra 27ine ya Komployê 9ê Teşrîna Verêne de ganî cinî, ciwan û şarî mabênê azadîya xo û yê Rayber Apoyî têkilîye awan bikerê. Ma eşkenê pêro biranê xelatan raşt bikerê. Ez venga her kesî dana ke bingeyê azadîya Rayber Apoyî de têkoşînêkê netîcegîrî bikerê, seba azadîye kom bibê û bi çalakîyanê afernayoxan dinya bivurnê.''