Endama Komîteya Merkezî ya PKKyî Hêlîne Umît beşdara bernameyêkê taybetî yê Medya-Haber TVyî bîye û serebûtê Sûrîye û Rojawanî ercnayî.

Ercnayîşanê Hêlîne Umît ra tayê qismê girîngî wina yê:

''Rejîmê Baasî paştdayîşê teberî ra payan ser de bi û qedîyayîşê nê paştdayîşî ra dima cade rijîya. Ma tim Sûrîye de pirrengîye û têdûştîya şaran pawitî. Sûrîye de xeylê dîn, bawerî û şarî ciwîyenê. La rejîmê Baasî tekperest bi. Coka nêeşka xo bipawo. Nika şar hewceyê sîstemêkê demokratîkî yo.

Îsraîl nika keno ke herême goreyê asayîşê xo dîzayn bikero. Ganî yewparetîya Sûrîye bêra pawitene. Seba ke Sûrîye parçe nêba ganî tewir bêro mojnayene.La hetê bînî ra Efrîn de hêzê îşxalkerî est ê. Serêkanîyê û Girê Sipî de zî rewşe wina ya. Ganî hukmato newe garantî bikero ke hêzê îşxalkerî do Sûrîye ra vejîyê. Heta ke meclîsêko demokratîk nêro ronayene û îşxalkerî xo apey nêancê ganî hêzê çekdarî yê sey QSD, YPG û YPJyî vila nêbê.

Hetê bînî ra Tirkîya torra xo ya organîke ya bi cergan nênimnena. Tirkîya xora seba hêrişanê neweyan gêrena mena. Dewleta tirke nê prosesî de bi hêrişan dişmenîya xo ya vera kurdan bi zelalî eşkera kerde. Dewleta tirke partîya ma PKKyî xo rê kena bahane, hêrişê Rojawanî kena, şarê ma qir kena û herême îşxal kena. 

Nê prosesî de anxî dewleta tirke cergê SMOyî çekdar kerdî û erşawitî ver bi Rojawanî. Hêrişê SMOyî yê vera Rojawanî zî hetê dewleta tirke ra yenê rêxistinkerdene. Xora dewleta tirke destpêkî ra nata mudaxeleyê karanê zereyî yê Sûrîye kerdêne. Nika zî dewleta tirke vana ke a do Sûrîye newe ra awan bikera. Yanî wazena îşxalî hîra bikera. 

Rayber Apoyî bi pawitişnameyanê xo û Paradîgmaya Neteweya Demokratîke rayîrê çareserîya meseleyan eşkera kerdibî. Çîyo ke meseleyanê Neteweyanê Yewbîyayeyan do çareser bikero na paradîgma ya.

Komelê Rojawanî ganî têkoşînê demokrasîyî berz bikero. No eşkeno qirkerdiş, şer û hêrişan ra şarê ma bipawo. Kurdî ganî serkêşîye bikerê ke Rojhelato Mîyanên krîzan ra bixeliso. Artêşa tirke ta îşxalkere hem wazena Şorişê Rojawanî bifatisna hem zî wazena bi cerganê xo yê sey SMOyî herême de cabikera.

Nê prosesî de girîng o ke kurdî bi yewî û yewîya neteweyîye têbigêrê. Ganî ma bieşkê şaran reyde têbigêrê. Dost, hêzê demokrasîyî, sosyalîstî, hêzê sosyalîstî nê wextî de ganî hîna zaf têbigêrê. 

Şerê Şarî yo Şorişgêr stratejîk o. Nê prosesî de ganî no metodê şerî bêro caardene. Rojawan de zî bingeyê strayejîya Şerê Şarî yê Şorişgêrî de ganî her kes têbigêro. No wext seba şaran wextê dîyarkerdişê qederî yo. Ma vînenê ke şarê ma yê Rojawanî wayîrê îradeyê xo vejîyeno û qerardar o. Ganî no dewam bikero. Bêguman ganî ma çeperanê xo hîna baş bipawê. Ma hîna zaf têkoşîn bikerê. Ma wextêkê winayênî de yê ke çarenûsî do dîyar bibê.''