DYA vera Haşdî El Şabîyo ke çend serrî verê cû vera DAÎŞî têgêrayo rojanê peyênan de hêrişê xo zêde kerdî. Hêrişê DYA yê vera Haşdî Şabîyo ke awanbîyayîşê ci ra heta nika ey ser o tesîrê Îranî esto yenê balantene.

DYA hêrişê xo yê 2ê çeleyî de Meydanê Mîyanneteweyî yê Bexdadî de Fermandarê Hêzê Qudûsî yê pabesteyê Artêşa Muxafizanê Şorişî ya Îranî Qasim Silêmanî û Fermandarê Haşdî Şabîyî Mehdî El Muhendîs kiştî. Reyna DYA perey şewe vakurê Bexdadî de hêrişê Ketîbeyanê Îmam Alîyî yê Haşdî Şabîyî kerd û Iraq û Sûrîye de zî zaf komê Haşdî Şabîyî xo rê kerdî hedef.Gelo Haşdî Şabî kam o ke çend serrî verê cû DYA ey reyde vera DAÎŞî şer kerd, seba fermîbîyayîşê înan ê goreyê qanûnê bingeyî yê Iraqî bêveng mend, destûr da ke debikewo weçînayîşanê Iraqî û referandumê Başûrê Kurdîstanî ra dima hêrişê înan ê vera Kerkûkî pey goş kerdî.

Haşdî El Şabî

Dima ke DAÎŞî serra 2014î de vejîya meydan û zaf wîlayetê sûnnîyan ê Iraqî vistî destî 3ê hezîranê 2014î de otorîteyê dînî yê Şîayî yê Iraqî Ayetullah Alî Sîstanî seba 'cîhadî' venga şîayan da û vengdayîşê ey ser o hêzanê Haşdî Şabîyî dest pê rêxistinbîyayîşî kerd. Na rêxistine xo bi di baskan rêxistin kerd. Baskê yewînî de komê nêzdîyê Îranî û Hîzbullahî û baskê diyînî de zî rêxistinanê nêzdîyê rayberê dînî yê Şîa yê Iraqî Muqteda Es Sadrî ca girewt ke sey ''neteperweranê ereban'' yenê naskerdene. Dima ke serekwezîrê ê wextî yê Iraqî Nurî El Malîkî yo ke nêzdîyê Îranî bi, pare kerd ke ê do meaş bidê kesanê ke tewrê Haşdî Şabîyî bîyî û bi paştdayîşê leşkerî yê Îranî Haşdî Şabîyî wextêkê kilmî de xo rêxistin kerd û vera DAÎŞî dest pê têgêrayîşî kerd. Çek, lojîstîk û fînansorîya Haşdî Şabîyî bi giranî Îranî girewt xo ser. Hêzê Qudûsî yo ke sey hêzê operasyonanê teberî yê Muxafizanê Şorişî yê Îranî yeno naskerdene, wezîfeyê perwerdekerdişê Haşdî Şabîyî ard ca. Qasim Silêmanîyî operasyonanê wîlayetê Enbarî de bi xo rayberîya Haşdî Şabîyî kerde.

Bîyî Hêzê Fermî yê Iraqî

Haşdî Şabî artêşa Iraqî reyde Ramadî, Fellûce, Tîkrît, Mûsil, Telafer û başûrê Şengalî de tewrê operasyonanê vera DAÎŞî bi. 26ê teşrîna peyêna 2016î de bi qanûnêko parlamentorê Iraqî de ame qebulkerdene sey ''hêzê pawitişî yê fermî yê Iraqî'' ame îlankerdene. Haşdî Şabî 7ê nîsana 2015î de bi bira Serekwezîrê Iraqî Haydar El Ebadîyî û Heyetê Wezîran raşt a raşt serekwezîrîye rê ame pabestene. Haşdî Şabî dima ke bi wayîrê statûyê fermîyî hîna pîlêr bi. Yeno texmînkerdene ke hûmara ci nika 200 hezar kesan ra zêdêr a.Muqteda Es Sadrî kontrolkerdişê Mûsilî ra dima pare kerd ke tay komê Haşdî Şabîyî kontrolî ra vejîyayî û mîsyonê xo temam kerd ke ganî bêrê batalkerdene.

Rêxistinê Tugayê Bedîrî, Esaîb Ehlulhakî, Ketîbeyê Hîzbullahî, Tugayê Elî Ekberî û Tugayê Ensar El Mercîyye zî tede binê sîwanan Haşdî Şabîyî de tewr tay 70 rêxistinî estî. Tugayê Bedîrî rayberîya rêxistinan ê terefgîranê Îranî kenê. Zaf komê nêzdîyê Sadrî zî artêşa Mehdîyî teqîb kenê. Hêrişê DYA yê yê peyênî ra dima Îranî sondê qesasî wend. Balkêş o ke otorîteyê dînî yê Şîa yê Iraqî Muqteda Es Sadrî zî veng da ke artêşa Mehdîyî newe ra kom biba. Esayîb Ehlul Hakî zî artêşa Mehdîyî ra cîya bîyî nêzdîyê Îranî yê. Na rêxistina ke Qeys El Xezalî rayberîya ci keno Necef, Kerbela, Bexdad de xo rêxistin kerd. Ketîbeya Hîzbullahî ya ke wextê mudaxeleyê DYA yê Iraqî serra 2003î de xo bingeyê ''artêşa Muxataran'' ser o rêxistin kerd eşkera kerd ke kome otorîteyê dînî yê Îranî Seyîd Alî Xamaneyî tesdîq kena. Bi taybetî mîyanê tirkmenanê Iraqî de sempatîzanê na kome zaf ê. Saraya El Selam nêzdîya serekwezîrê verênî yê Iraqî Haydar Ebadîyî ya û na kome sere de Samarra û Necef zaf herêman de kar kena. Serra 2014î de hetê Muqteda Es Sadrî ra ameye awankerdene.

Komê bînî yê Haşdî Şabîyî nê yê:

* Tugayê Alî Ekber

* Tugayê Ensar El Merciyye

* Ketîbeya Îmam Alîyî

* Ketîbeyê Firkatûl Ebbasî

* Feylaq El Kerrar

* Seraya El Cihad

* Seraya Ensal El Aqide

* Hareket El Nucebba

* Ketîbeya Ebû Fadil Ebas

* Ketîbeya Şehîd El Aval

* Seraya El Cihad

* Ketîbeya Tayyar El Rîsalî

* Ketîbeya Ehrar El Iraqî

* Ketîbeya Difaa El Mukaddesî

* Ketîbeya Ruhallahî

* Ketîbeya El Gadabî

* Ketîbeya Ensar El Hicce

* Ketîbeya Îmam Huseyînî

* Mucahîtên Hîzbûllah ên Iraqî

* Ketîbeya Îmam El Gaîbî

* Feylak El Vaad El Sadık

* Kuvvet El Şehid Sadr

* Lîva Youm El Kaîm

* Liva Esedulah Galip

* Hîzbullah El Sayrun

* Lîva Zulfîkar

* Lîva El Muntadar

* Mukavveme Îslamîye

* Lîva Îmam El Hasan El Mucteba

* Hîzbûllah El Ebrar

* Saraya El Zehra

* Hareket El Abdal

* Lîva Ammar Îbnî Yasir

* Ketîbeya Fettah El Mubîn

* Ketîbeya Şebab El Rîsalî

* Lîva El Sadikeyn

* Lîwa Îmam El Kaîm

* Lîwa El Kaîm

* Lîwa El Karya

* Seraya Aşura

* Tugayê Babîliyyûn.