Hemşaredarê Colemêrgî Mehmet Siddik Akiş vizêr amebi destbendkerdene û herinda ci de qeyûm amebi tayînkerdene. 

Akişo ke Wan de amebi destbendkerdene nika Mudirîya Polîsan a Colemêrgî de tepişîyeno. Akişî ewro avûkatanê xo de pêvînayîş kerd. Avûkat Omer Akişî da zanayene ke moralê hemşaredarî ca de yo.

Omer Akişî pare kerd ke Hemşaredar Mehmet Siddik Akişî pêro xoverdayoxî selam kerdê û vat: ''Birêz Akiş seba kombîyayîşî şibi Amedî û seba ke bibi erey Wan de mendbi. O wexto ke agêrayêne Colemêrgî ame destbendkerdene. Medyaya terefgîre helê destbendkerdişî sey 'wexto ke remayo tepişîya' servîs kerdî. Hetê bînî ra qaşo dosya ser o bira nimitişî est a la medyaya îqtîdarî detayan pare kena. Hemşaredar Akiş yeno hedefkerdene. Wa çew bi nê manîpulasyonan mexapîyo.''