Mersin de 10 çeleyî de Hemşaredarê Akdenîzî Hoşyar Sariyildiz û Nurîye Aslan û Endamê Meclîsê Şaredarîye Ozgur Çaglar, Neslîhane Oruç, Yakup Daniş û Hîkmet Bakirhan  sereştişê keyeyanê înan de ameyî destbendkerdene.

Kesê ke ameyî destbendkerdene vizêr sewqê edlîye bîyî. Hemşaredarî Hoşyar Sariyildiz û Nurîye Aslan û Endamê Şaredarîye Ozgur Çaglar, bî îdîyaya ''Endamîya rêxistene'', ''Propagandaya rêxistine'', ''Hetkarîya fînansî ya rêxistine''  û ''Muxalefetê 2911'' endamê meclîsî yê  bînî zî bi îdîaya ''Endamîya rêxistene'' dadgerîye rê ameyî sewqkerdene.

 Dadgerîya Cezaya Suhlî ya de derheqê Hemşaredaran Hoşyar Sariyildiz û Nurîye Aslan û Endamanê Meclîsê Şaredarîye Ozgur Çaglar, Neslîhane Oruç û Hîkmet Bakirhanî de qerarê tepiştişî girewt. Endamê Meclîsê Şaredarîye Yakup Daniş zî bi şertê kontorlê edlîyî serbest ame veradayene.

Şarê ke verê edlîye de pawitene vera qerarîê tepiştişî bi slogana ''Ma do bi xoverdayîşî ser bikewê'' nêrazîbîyayîş ramojna û eşkerayîya çapemenîye daye.

Hemserekê OHDyî yê Mersinî Îbrahîm Kayayî vat qerar xora verî ra amebi girwetene, tîyatroyêk ame kaykerdene.

Hemereka DEM Partî ya Mersinî Bedriye Kuş zî vat: ''Embazê ma bi qerarêkê sîyasîyî ameyî tepiştene. Înan qet sûcêk nêkerd. No şar do cewabê na polîtîka bido. Ma nê qerarî nas nêkene. Ganî no qerar cade pêser bêro girewene. Ma peyê têkoşînê embazanê xo de yê. AKP rejîmê qeyûmî yo, mird nêbeno.''

Eşkerayîye de semedê tewrbîyayîşê têhetameyîşê saete 13.00 yo ke do Parka Domanan a Ozgurî de bêro kerdene, ame vengdayene.

Wezîrîya Karanê Zereyî da zanayene ke înan herinda hemşaredaran de qeyûm ca kerdo. Eşkerayîya wezîrîye de dîya zanayene ke Qeymaqemê Akdanîzî Zeyît Şener sey qeyûmî şaredarîye de ameyo cakerdene û ame vatene ke hîrê endamê meclîsî karê xo ra ameyî dûrfînayene.