Hemşaredarê Dêrsimî Cevdet Konako ke erkê ci ameyo xespkerdene ANFyî rê qisey kerd.

Konakî da zanayene ke 20ê teşrîna peyêne de bi lezî bira hepsî dîyaya û vat: ''Ma rê endamîya rêxistine ra cezaya zîndanî ya 6 serran û 3 mengan dîyaye. Dêrsim nê îşxalan hol zaneno û têkoşînî zî hol zaneno. Ma 7 mengan ra nata erkê xo ser de, hetê şarê xo de yê. 22yê teşrîna peyêne de sey wextanê 12ê êlule û serranê 90an dormeyê şaredarîye gêrîya.

Şarê Dêrsimî vera xespkerdişî tewirê xoverdayîşî mojna. Her kuçe, taxe de şarê Dêrsimî xo ver dano. Leşker û polîsî bi çekan kenê ke şarê ma bitersnê. Wa hol bizanîyo ke ma do îradeyê xo teslîmê hêzanê îşxalkeran nêkerê ke ê îradeyê kurdan çin hesibnenê. Şarê Dêrsimî texrîbatê îşxalkeran hol zaneno. Ma do vera faşîzmê AKP-MHPyî û walîtîya kolonyalîste heta peynî têkoşînê xo rê dewam bikerê.

Ma venga pêro dostanê Dêrsimî danê ke tîya erdê Denîz, Mahîr, Îbrahîm, Mazlûm Dogan, Sakîne Cansiz, Aysele Doganan û embazanê bêkefenan o. Ganî tîya de her kes wayîrê erdê xo, şaredarîya xo vejîyo. Ma tewrê cenazayanê erjanê şarê xo bîyê, HES û awbendî protesto kerdî. Nê sey sûcî hesibîyayê. Ez ewro zî siba zî nê sûcan do bikera. Ez venga pêro hemrayan dana ke wa wayîrê Dêrsimî vejîyê.''