Hemşaredara Amedî Serra Bucak derheqê projeyanê înan ê serê Amedî de ANFyî rê qisey kerd.

Serra Bucak da zanayene ke prosesê weçînayîşan ra nata ê mîyanê şarî de bîyê û vat: ''Şarê ma weçînayîşan de îradeyê xo mojna û bi kerdoxê weçînayîşan. Bi taybetî serkewtişê xoverdayîşê Wanî ra dima şar de moral û motîvasyonêko pîl est o. Amed de rayê ma zêdîyayî û ma bi ferqêkê pîlî ser kewtî.''

Serra Bucak bale ante texrîbatanê qeyûman ser û vat: ''Amed de qeyûmî sebebê krîzanê ekonomîk, sosyal, kulturel û nasnameyî yê. Ma do hêverî texrîbatanê fîzîkîyan raşt bikerê. Ma do dezgehanê ziwan û kulturî ancî abikerê, seba averşîyayîşê ziwanî kursanê kurdkî abikerê. Awe nêşina 17 dewanê ma. Ma do na mesele û meseleya binawanîye zî çareser bikerê. Ancî ma do dezgehanê cinîyan newe ra abikerê. Amed do ancî bibo şaristanê polîtîka û vateyê cinîyan.''

Serra Bucak îfade kerd ke têkoşînê înan û kedê şarî pîl ê û vat: ''Ma do derheqê texrîbatanê qeyûman de cigêrayîşan bikerê û şarî rê pare bikerê. Ma do şaristanê xo de newe ra prosesê awankerdişî bidê destpêkerdene. Ma do pêro texrîbatanê qeyûman biqedînê û şarê xo reyde pêro waran de bixebitê. Ma do seba ciwanan  û cinîyan waranê îstîhdamî awan bikerê. Ma do vera polîtîkayanê şerê taybetî bixebitê.

Têkoşînê cinîyan de sîstemê hemserekîye wayîrê cayêkê girîngî yo. Ma do her warê sîyasetî û şaredarîye de sîstemê hemserekîye bîyarê ca.''