Mehkemeya Heqanê Merdiman a Ewropa (MHME) cezaya muebedeya girankerde ya ke dîyabî Rayberê Şarê Kurdî Abdullah Ocalanî dûştê Peymana Heqanê Merdiman a Ewropa dîbî. La rixmo ke na bire ra 10 serrî vîyartê gamêke nêerzîyaye. Komîteya Wezîran a Konseya Ewropa roniştişanê xo yê 17-29ê êlule de bira binpaykerdişî ya MHME do biercna. Hemserekê Pêroyî yê Komeleya Heqanê Merdiman a Ewropa (ÎHD) 

Hemserekê Pêroyî yê ÎHDyî Huseyîn Kuçukbalabanî Huseyîn Kuçukbalabanî derheqê babete de ANFyî rê qisey kerd.

Kuçukbalabanî vist vîrî ke MHME 'Bira Gurbanî' 10 serrî verî dabî û tewr peyên kanûnê 2021î de dosya amebî ercnayene. Kuçukbalabanî vat: ''Komîteya Wezîran îfade kerd ke Tirkîya ganî wextêkî ra dima heqê newe ra ercnayîşê cezaya mubede bişinasna, qanûnanê serê ney bivurna û derheqê ê kesanê ke cezaya muebedeya girankerde girewta de agahîye bida. La Tirkîya nê birî nêardî ca.

Kuçukbalabanî ard ziwan ke roniştişê êlule de zî birê winayênî do bigêrîyê û vat: ''Nê roniştişan de dewayê Kavala û Demîrtaşî zî do bêrê cigêrayene. Dewaya Kavalayî de Tirkîya cara prosedur binpay kerdo. Komîte seba caardişê bira Kavalayî tedaya Tirkîya do bikera, biwaza ke biranê ci bîyara ca. Goreyê mi Komîte heta ke bira Kavalayî bida caardene dosyayanê sey Gurbanî de pêşnîyazê xo do dibare bikera. Bêguman tîya de bara xurtbîyayîşê lobîya Tirkîya ya mîyanê mehkeme est a. Mîsal CPT zîyaretê xo yê emserînî de nêşi Îmrali. Seba caardişê biranê koma Gurbanî Tirkîya de îradeyêko sîyasî û prosesêkê haştîye lazim ê.''

Kuçukbalabanî da zanayene ke Abdullah Ocalan babeta çareserîya meseleya kurdan de aktorêko tewr krîtîk o û vat: ''Dewlete bi xo zî girîngîya nê aktorî zanena. Sey ÎHDyî ma tim haştîye û azadîye pawenê. Ma vanê ke ganî meseleya kurdan bi polîtîkayanê haştîye bêra çareserkerdene. Abdullah Ocalanî ra çar serrî yo xebere nêna girewtene. Ma na mesele sey meseleyêka heqanê merdiman vînenê. Sey komele ma çend reyî waşt ke Îmrali zîyaret bikerê la cewab nêdîya muracatanê ma. Ma venga hukmatî û dewleta tirke danê ke polîtîkayanê nikayênan ra fek vera bidê, polîtîkayanê ke xizmetê haştîya komelkîye kenê wa bikerê. Sey gama yewine zî ma venga dewlete û Wezîrîya Edaletî danê ke wa destûr bidîyo pêvînayîşê Ocalanî yê bi keye û avûkatan.''