8ê hezîrane de Amed de 20ê ci rojnamegerî 22 kesî ameybî destbendkerdene. 8 rojan 22 kesî nezaret de mendî û dima 16 rojnamegerî bi îdîaya 'endamîya rêxistine' ameyî tepiştene. Nînan ra yew zî Hemserekê Komeleya Rojnamegeran a Dîcle Firatî (DFG) Serdar Altan o.

Altanî bi rayîrê avûkatanê xo mesajêk şawit. Altanî mesajê xo de pare kerd ke tepişîyayîşê rojnamegeran yew tîyatroyê îqtîdarî yo.  Altanî dîyar kerd ke roja ke ê ameybî destbendkerdene, serrgêra qetilkerdişê rojnamegerê kurdî Hafiz Akdemîrî bîye û hişmendîya ê çaxî xîret kena ke ewro bi tepişîyayîşî rojnamegeran bêveng bikera.

Altanî vat: ''Seba ka ma raştîye nuştêne tepişîyayî. Heqê fikr û azadîye qet yew dewrî de hende nêamebi binpaykerdene. Heta nika tewr tay 60 rojnamegerî tepişte bîyî û pê tepişîyayîşê 16 rojnamegeranê bînan na hûmare zêdîyaye. No mojneno ke na mesele çendek pîl a. Wexto ke ma dest pê mektubê xo kerd ke ma vat ke no yew mîzansen o. Eşkera yo ke îqtîdar pê nê mîzansenî wazeno ma bêveng bikerê û komelî ra biqerifnê. Coka na dosya de rojnamegerî nê ê yenê muhakemekerdene. Rixmê hende çîyan zî ma do tim raştîyan vajê. Ê do nêeşkê ma bêveng bikerê.  

Bi na wesîle ma reyna hemmesleganê xo, rêxistinanê çapemenîye, dezgehanê komelê sivîlî û şarê xo rê sipas kenê ke vanê 'Ma do bêveng nêmanê.' Ma avûkatanê xo rê zî sipas kenê ke wextê destbendkerdiş û tehqîqatî de ma têna nêverdê.

Seba ke ma nê vengî berzêr û xurtêr bikerê ganî ma bi waştişêkê pîlêrî bixebitê. Coka ma paştdayîşî pîl bikerê. Ez reyna hes kesî selam kena.''

16 rojnamegerê ke ameyî tepiştene nameyê înan wina yê: Mudira Jinnewsî Safîye Alagaş, Hemserekê DFGyî Serdar Altan, Edîtorê MA Azîz Oruç, Mudirê Karanê Nuşteyî yê Xwebûnî Mehmet Alî Ertaş û Zeynel Abîdîn Bulut, Omer Çelîk, Mazlum Dogan Guler, Îbrahîm Koyûncû, Neşe Toprak, Elîf Ungur, Abdûrrahman Oncu, Sûat Dogûhan, Remziye Temel, Ramazan Gecîken, Lezgîn Akdenîz û Mehmet Şahîn.