Hemserekê KNKyî: Ganî Swêd kurdan ra uzrê xo biwazo

Hemserekê KNKyî Ahmet Karamuşî pare kerd ke ganî semedê sûcdarkerdişê kişîyayîşê Olof Palmeyî ra Swêd kurdan ra uzrê xo biwazo û hînî PKK nêro sûcdarkerdene.

Çend rojî verê cû şefê polîsan Hans Melanderî da zanayene ke eleqeyê PKKyî û kurdan pê kişîyayîşê Olof Palmeyî çin o. Kongreya Neteweyî ya Kurdîstanî (KNK) hukmatê Swêdî ra mektubêk şawit û waşt ke ganî Swêd kurdan û PKKyî ra uzrê xo biwazo.

Hemserekê KNKyî Ahmet Karamuşî nê armancî ser o Serekwezîrê Swêdî Stefan Lofven û Wezîrê Karanê Zereyî Mikael Dambergî ra mektubêk nuşt.

Karamuşî îfade kerd ke Mudirê Asayîşî yê Stockholmî Hans Holmerî bi taybetî xîret kerd ke berpirsîyarîya kişîyayîşê Olof Palmeyî bierzo milê PKKyî. Karamuşî vat: ''O çax Holmerî waşt 50 kurdî bitepişê. La mehkeme destûr nêda. Holmerî 20 kurdî destbendkerdî. Dima ke eşkera bi ke sûcê înan çin o pêro ameyî veradayene. Holmerî PKKyî kerd sûcdar. Komîsyon pê hesîya ker Holmerî pê zanayîşî kurdan keno hedef, o wezîfe ra girewt. Hêzê tarî yê peyê kişîyayîşê Palmeyî kurdî kerdêne hedef û manîpulasyon kerdêne. Hukmatê Swêdî, hêzanê globalan û Tirkîya zaf xîret kerd ke PKK sey sûcdar bimojnê. Medyaya tirkan zî PKK sey berpirsê kişîyayîşê Palmeyî mojnayêne.''

Karamuşî ard ziwan ke Olof Palme dostêkê kurdan bi. Terefgîrê şarê kurdî bi. Karamuşî vat: ''Kişîyayîşê Palmeyî ra dima kurdî sey sûcdar ameyî dîyene. PKK zî sey rêxistina terorî ame sûcdarkerdene. Kurdan bedelêko pîl da. O çax Swêdî kurdan ra zaf hes kerdêne. La kişîyayîşê Palmeyî ra dima ma sey terorîst ameyêne dîyene. Domanê ma tersayêne ke dibistane de vajê 'ma kurd ê.' O çax ez endamê Federasyonê Kurdan bi. 4 serran qet yew şîrkete seba lokalî ca nêda ma. Çew keye nêdayêne kurdan. Raşta zî kurdan rê zaf teda ameye kerdene. Welatanê bînan ê Ewropa zî sey Swêd PKK 'terorîst' îlan kerd. Kurdî bi serran o ke mexdûr ê. Ganî na mexdûrîye werte ra bêra wedaritene.  

Ma nameyê KNKyî ser o Serekwezîr Stefan Lofven û Wezîrê Karanê Zereyî rê mektubêk erşawit. Ganî Swêd kurdan ra uzrê xo biwazo. Ganî Swêd serê PKKyî ra etîketê 'terorîstî' wedaro û seba ke welatê bînî yê Ewropa zî heman çi bikerê têbigêro. No waştiş û hesretê şarê kurdî yo.''