Vera hêrişê îşxalî yê dewleta tirke ya îşxalkere û çeteyanê ci yê vera Awbendê Tişrînî xoverdayîşo tarîxî yê şervananê QSD, YPG û YPJyî dewam keno. No xoverdayîş hêrişan bi qerardarîye pîle û îradeyê xurtî peyser qeldeno.

Fermandarê Cepheyê Awbendê Tişrînî Serxwebûn Kobanêyî rewşa peyêne ya Awbendê Tişrinî erjnaye. Serxwebûn Kobanêyî ard ziwan ke şervanê înan bêmabên xover danê û nê vatî:

''Hêrişkaran vat qey ê çend rojan de eşkenê herra Sûrîye bifînê dest. Nê îşxalkerî zî kenê ke sey DAÎŞî bi propaganda aver şirê. Şervanê azadîye nê propagandayan betal kenê. Çeteyî vera şervanan bêçare mendî. Awbendê Tişrînî de 12 rojî xoverdayîşo tarîxî ame dayene. Senî ke hêzanê YPGyî 2014 de DAÎŞ bin fîna û şarê dinya tarîtîye ra xelisna, ewro zî eynî çîyî kenê. Şervanêkê ma zî cayê xo ra nêvejîyayo. Eqsê cide şervanê ma derbanê gidan danê piro. Dewleta tirke bi xeberanê zûran îdîa kena ke awbend fînayo dest. Nê xeberî raşt nîyê. Awbend binê kontrolê ma de yo. Wa şarê ma propagandaya dewleta tirke ya mexapîyo. Heta ke Awbendê Tişrînî de şervanêk zî bibo awbend do destê ma de bo.''