Endama Komîsyonê Heqanê Merdiman ê Meclîsî û Wekîla HDPyî Gulistane Kiliç Koçyîgît tecrîdê Îmraliyî û grevê vêşanîye yê tepişteyan ercnayî.

Koçyîgîte bale ante ser ke cigêrayîşo rût, pirodayîş, heqaret, payan ser humaritiş, tecrîd, şertê karantîna, astengkerdişê şîyayîşê nêweşxaneyî, werdê qîmî nê pêro kerdişê zîndananê Tirkîya yê. Koçyîgîte vat: ''Destpêkê janî ra nata seba pêvînayîşê rî bi rîyî destûr nêdîyeno. Wezaretî derheqê mesele de eşkerayîyêke zî nêdaye. Îqtîdar kongreyan keno de la zîndanê ke şert û mercê ci giran ê pê hîşmendîya 'kampa qirkerdişî' îdare keno.''

Koçyîgîte vist vîrî ke tepişteyî coka vera tecrîd, binpaykerdişanê heqanê xo û têgerayîşanê xiraban çalakîya grevê vêşanîye kenê. 

Koçyîgîte îfade kerd ke betalkerdişê înfazî sîstemê AKPyî yo û vat: ''Merdimî cezayanê xo ancenê la key zîndanî ra vejîyê pê bahaneya 'poşman nêbîyê û perwerê rêxistine yê' reyna erzîyenê zîndanan.''

Gulistane Kiliç Koçyîgît bale ante nîqaşanê 'Planê Çalakîye yê Heqanê Merdiman' û qanûnê bingeyî yê neweyî ser û karakterê îqtîdarî nîşan kerd.

Koçyîgîte vat: ''Îqtîdaro ke qanûnê bingeyî yê nikayênî binpay keno, nêhesibneno, qanûnanê ci nêano ca nêeşkeno qanûnêkê azadîperest û demokratîkî awan bikero.''

Koçyîgîte pare kerd ke sîstemo bêedalet tewr zaf tesîrê zîndanan keno, tesîrê azadîwaştoxan keno, tesîrê merdimanê ke wazenê meseleya kurdan pê rayîrê demokratîkî çareser biba, keno. No tewr zaf zî Birêz Ocalanî rê tesîr keno ke wazeno meseleya kurdan pê rayîranê demokratîkan çareser biba. Ma meseleya Îmraliyî tedeyîya xo ra cîya nêvînenê. Tecrîd çimeyo bingeyî yê bêedaletî yo. Heta ke Îmrali de bêhuqûqî û bêedaletî nêqedîyê heta ke tecrîd nêqedîyo çew nêeşkeno qala têdûştî, azadî û edaletî bikero.''