Hetkarê Sekreterê Pêroyî yê Yewîya Avûkatan ê Seba Heqanê Merdiman a Dinya û Demokrasî (ELDH) Thomas Schmidtî derheqê tecrîdê vera Rayberê Şarê Kurdî Abdullah Ocalanî de ANFyî rê qisey kerd.

Thomas Schmidto ke seba wedaritişê tecrîdî muracatê CPTyî kerdbi vat: ''ELDH, Avûkatanê Demokratîkan ê Ewropa (EDL) û Avûkatanê Seba Avûkatan CPTyî rê waştişnameyêk şawit. Ma waşt ke Roja Avûkatan a Tirkîya de muracatê CPTyî bikerê ke Zîndanê Îmraliyî zîyaret bikero û qedexeyê pêvînayîşê bi avûkatan cibigêro. Heqanê Ocalanî rê hûrmet nêno mojnayene. Heqê merdiman Îmrali de bi hawayêkê îlegalî yenê binpaykerdene. 

Qedexekerdişê pêvînayîşan Krîteranê Neteweyanê Yewbîyayeyan û Krîteranê Nelson Mandelayî, pêşnîyazanê CPT û Qanûnê Înfazî yê Tirkîya bi hawayêkê zelalî binpay kenê. CPT çar serran de rayêke 47 dewletan de zîyaretan keno û pêşnîyazan keno. La selahîyetdaranê tirkî pêşnîyazanê CPTyî nêanê ca. SElahîyetdarî têna heqanê Ocalanî û embazanê ey nê Peymana Ewropa ya Serê Vergirewtişê Kerdişanê Xiraban û Îşkenceyî zî nêanê ca û CPTyî rê hûrmet nêkenê. CPTyî 1999 ra nata 10 reyî Îmrali zîyaret kerdo. Rewşa Îmraliyî raporê 5ê tebaxa 2020î yê CPTyî de ca gêna. Ganî Îmrali de goreyê raporê CPTyî sereraştkerdişî biameyêne kerdene. La cezayê dîsîplînî yê neweyî û qedexeyî yenê ferzkerdene.

MA venga CPTyî danê ke raporê xo yê 5ê tebaxa 2020î teqîb bikero û çi hewce yo bikero. Vera qedexeyê Îmraliyî CPT wa têbigêro û Îmrali zîyaret bikero, raporêkê neweyî amade bikero.''