Beşdaranê Konferansê Haştîye û Demokrasîyî yê Berlinî ra Wezîrê Karanê Zereyî yê verênî yê Îzlanda Ogmundur Jonassonî derheqê tecrîdê vera Rayberê Şarê Kurdî Abdullah Ocalanî de ANFyî rê qisey kerd.

Jonassonî dîyar kerd ke Abdullah Ocalan 1999 ra nata Îmrali de tecrîdkerde yo û vat: ''Na rewşe vera peymananê mîyanneteweyîyan û heqanê merdiman a. Tecrîd a raşte îzolekerdişê kurdan o. Anqara bi tecrîdî tim mesajan dana şarê kurdî û têgêrayîşê azadîye. CPTyî raporê xo yê 2019î de vatbi ke ganî tecrîdê Îmraliyî biqedo. La çîyêk nêbi. Verê cû ez heyetêkî de şîya Îmraliyî. Mi dî ke Tirkîya haştîyêka bêşerte nêwazena. Haştîyêka bişerte wazena. Şertê ci zî no yo ke wa kurdî îteatî bikerê. 

Tewr peyên par gulane de, ez tewra heyetê Îmraliyî bîya. Dima ma kombîyayîşê çapemenîye kerd. O çax ma Konseya Wezîran rê pers kerd ke gelo ê tecrîdî senî ercnenê. La nînan vat ke 'Ma nêeşkenê cewab bidê ney.' Yanî wa çew Tirkîya û Konseya Wezîran a Ewropa ra çîyêk hêvî nêkero.''

Jonassonî pare kerd ke temamîya dinya de şerêko cidî est o û vat: ''La eke Tirkîya Abdullah Ocalanî vera bida, sey serranê 2013-2015î prosesêkê çareserîye bida destpêkerdene do bieşka haştîye bîyara ca. Na haştîye do tesîrê pêro parçeyanê Kurdîstanî û Rojhelatê Mîyanênî zî do bikera. Dinya hewceyê ney a. Yanî wedarîyayîşê tecrîdî do tesîrê Rojhelatê Mîyanênî û pêro dinya bikero.''