Heyetê Îmraliyî yê DEM Partî ke Îmrali de di reyî Rayber Apoyî reyde pêvînayîş kerdî na çarçewe de Başûrê Kurdîstanî de pêvînayîşan keno.

Heyetê Îmraliyî ewro seatanê serê sibayî de Neçîrvan Barzanî reyde ame têhet. Pêvînayîş ofîsê Barzanîyî yê Hewlêrî de ame kerdene.

Pîya bi endamanê Heyetê Îmrlaiyî Pervîne Buldan û Sirri Sureyya Onder, Hemserekê Pêroyî yê DBPyî Keskîn Bayindir, Buroyê Huqûqî yê Asrinî ra Ozgur Erol û Îbrahîm Bîlmez, Hemvervatoxê Komîsyonê Tekîlîyanê Teberî yê DEM Partî Berdan Ozturk, parlamenterî Gulcane Kaçmaz Sayyigit û Mehmet Kamaç tewrê pêvînayîşanê Başûrê Kurdîstanî bîyî.

Hemserekê Pêroyî yê DBPyî Keskîn Bayindirî ke badê pêvînayîşê Neçîrvan Barzanîyî zanayîş da çapemenîye, nê vatî: ''Ma Birêz Neçîrvan Barzanîyî rê selamê Birêz Ocalanî vatî. Ma zaf germin pêşwazî kerdî.  Tewirêko neteweyî yê Neçîrvan Barzanî û heyetê ci yê vera prosesê Tirkîya bibi. Neçîrvan Barzanîyî ard ziwan ke o proseso ke newe yeno averdene ra hêvîdar o vat semedê paştdayîşê prosesî do çîyo ke destê ci ra bêro bikero. Nê prosesî rê paştdayîşê hêzanê Kurdîstanî semedê ma zaf muhîm û qiymetin ê.''

Goreyê eşekrayîya Buroyê Çapemenîye yê DEM Partî heyetê siba do Silêmanî de Rayberê YNKyî Bafil Talabanî û Hetkarê Serekê Herêma Kurdîstanî Kubat Talabanî reyde pêvînayîş bikerê.

Heyetî 16ê sibate de pêvînayîşê xo yo verêne Serekê PDKyî Mesûd Barzanî reyde kerdbi. Heyetî selamê Abdullah Ocanî  û mesajê ci yê derheqê prosesî Barzanî dir pare kerdbî. Badê pêvînayîşî Ofîsê Çapemenîye yê Barzanî eşkerayîya xo de vatbi Barzanî do paştî bido prosesê neweyî.