Dewaya Kobanê ya ke roniştişê ci yo verên bê avûkatan ame kerdene de 3ê gulane rê pey de ameye eştene. Heyetê mîyanneteweyî yê ke dewa teqîp kerd verê Merkezê Pêroyî yê HDPyî de eşkerayîye daye.

Francois Alfonsi:  Ma ewro reyna  dîye ke na dewaya sîyasîye ya dîktatorêkî ya. Heqê avûkatanê pawitişî ame binpaykerdene. Salon de polîs û leşkerî bibî. Ma hêvî ke netîceya dewa de heme kesê ke yenê muhakemekerdene bêrê veradayene.

Brando Benifei:  Ma semedê paştîdayîşê HDPyî tîya yê û vera rejîmê dîktatorîye yê Erdoganî vejîyenê. Serekê Îtalya Mario Draghî Erdoganî rê vatbi dîktator. Ma ewro tîya na dîktatorîye dîye.

Anna Miranda: Na dewa semedê gayrîmeşrûkerdişê HDPyî ameya organîzekerdene.  Ma ewro tîya tîyatroyêkê sîyasîyî rê şahîde kerde. Ma do destûrê nayî medê. Ne Yewîya Ewropa de ne zî dinya de ma do destûr nêdê.

Eric Coquerel: Seba ke HDPyî  paştî daya Kobanê yenê muhakemekerdene ke kurdanê Kobanê vera DAÎŞî şer kerdêne. Salone mehkeme de semedê 300 polîsan ca bibê la semedê avûkatanê HDPyî ca çînêbi.

Maciej Konieczny: Mehkeme de yew dadger bibê ke hewce nêdîyêne ke hetdarîya xo binimno. Muhkemekerdişo edîl nêbi.

Marta Rosique: Na dewa semedê krîmînalîzekerdişê têgêrayîşê kurdan û HDPyî yena kerdene.

Eulàlia Reguant:  Ma zanê ke na dewayêka sîyasîyî ya coka ma semedê paştdayîê têgêrayîşê kurdan tîya yê.

Hîşyar Ozsoy: Ma heyetê rê zaf spas kenê ke cayanê cîya cîyayan ê dinya ra semedê paştdayîşî HDPyî ameyî.

Welatanê cîyayan ra 11 heyetî tewrê roniştişî bîyî, nînan ra tay wina yê:

Marta Rosique -Partîya Çepe ya Komargeran a Katalonya, Sekretero Pêroyî yê Komîsyonê Mîyanneteweyî yê Max Zanartu-Barselona, Eulàlia Reguant-Parlamenterê Meclîsê Katalan, Oihana Etxebarrieta Legrand-Bask BILDU, Francois Alfonsi-AP Endamê Koordînasyonê Koma Dostanîya bi Kurdan / Greens/EFA Parlamenter, Ana Miranda-Parlamentera Koma EFA ya Parlamenta Ewropa, Jean-Christophe Sellin - Hemkoordînatorê Partîya Çepe ya Fransa û Endamê Meclîsê Herêmî, Eric Coquerel - Endamê Meclîsê Neteweyî yê Partîya Fransa ya Serînatewîne, Emilie Marche-Endama Meclîsê Neteweyî yê Partîya Fransa Serînatewîne, Brando Benifei-Parlamenterê Koma Demokratan û Sosyalîstan a Parlamenta Ewropa, Evîne Încir-Parlamentera Koma Demokratan a Parlamenta Ewropa."