Ewropa ra heyetêk vera tecrîdê serê Rayberê Şarê Kurdî Abdullah Ocalanî ame Îstanbulî. Heyetê Delegasyonê Mîyanneteweyî yê Vera Tecrîdî û Seba Meseleya Kurdan rê Çareserîye' ewro hêverî Buroyê Huqûqî yê Asrinî zîyaret kerd. 

Avûkatan Suzane akîpa, Îbrahîm Bîlmez, Cengîz Yureklî, Rêzan Sarica û Mazlûm Dînç, Vervatoxa Komîsyonê Têkilîyanê Teberî yê DEM Partî Ebru Gunay heyet pêşwazî kerd. 

Heyet de Temsîlkara Partîya Çepe ya Almanya Konstanze Kriese, Sereka EFA Maria Lorena Lopez De Lacalle, Temsîlkara Partîya Çepe ya Swêdî Ann Jessica Theresa Karlqvist, Senatorê Meclîsê Neteweyî yê Îspanya (BASK) Josu Estarrona Elizondo, Wekîlê Parlamentoyê Katalonya Montserrat Vinyets Pages, Senatorê grûba Partîya Serenênawarî ya Fransa Ségoléne Amiot, şêwirmenda partîye Clément Evans û Wekîlê Partîya Sûre ya Norwêçî Hege Bae Nyholt cagênê.

Îbrahîm Bîlmezî zîyaret de derheqê tecrîdê Îmraliyî de agahîyî dayî. Zîyaretî ra dima Bîlmezî qisey kerd û vat: ''Ma wazenê pêro xîretanê seba pêvînayîşê Birêz Ocalanî rê destek bidê. Coka no zîyaret seba ma zaf girîng o.''

Dima metnê heyetî ame wendene. Metn de ame parekerdene ke nêçareserkerdişê meseleya kurdan tesîrê pêro herême keno û têgêrayîşê kurdan o sîyasî tim seba çareserkerdişê mesele xîret keno. Metn de dewa û cezayê ke dîyayê sîyasetmedaranê kurdan ameyî şermezarkerdene.

Metn de bale ameye antene tecrîdê vera Abdullah Ocalanî ser û wina ame vatene: ''Seba ke meseleya kurdan bi hawayêkê haştîyaneyî û mendeyî bêra çareserkerdene, tedayê vera partîyanê kurdan biqedê û prosesê dîyalogan newe ra dest pêbikero ganî tecrîdê vera Ocalanî bêro wedaritene. Ocalan 2005 ra nata sîstemê Konfederalîzmê Demokratîkî paweno. Tecrîdê vera Ocalanî dûştê heqanê merdiman û huqûqê mîyanneteweyî yo ke ma nê tecrîdî şermezar kenê. Hînî wext wextê haştîye û pîyaciwîyayîşî yo. Hînî wextê ci ameyo ke Abdulah Ocalan azad bibo. 

Ma do Înîsîyatîfê Paştdayîşê bi Kurdîstanî reyde seba çimdarîya weçînayîşê 31ê adare xîretanê xo rê dewam bikerê. Ma do paştî bidê Delegasyonê Ewropa yê DEM Partî.''

Heyet ewro temsîlkaranê partîyanê sîyasîyan de do bêro têhet.