Wekîlê HDPyî Feleknase Uca û Hîşyar Ozsoy tewrê kombîyayîşê Meclîsê Parlamenteranê Konseya Ewropa (MPKE)yê Strasbourgî bîyî. Dima wird parlamenterî temsîlkaranê Komîteya Vergirewtişê Îşkenceyî (CPT) yê Konseya Ewropa reyde roniştî. Pêvînayîş de tecrîdê Îmraliyî û grevê vêşanîye yê tepişteyan ameyî ercnayene.

Hîşyar Ozsoyî derheqê pêvînayîşî de ANFyî rê qisey kerd.

Osoyî îfade kerd ke tewr peyên meng çeleyî de înan CPTyî reyde pêvînayîşê telefonî kerdbi û vat: ''Narey ma pêvînayîşê têrî kerd. Ma rewşa xirabe ya zîndananê Tirkîya pare kerde. Meseleyê tepişteyan ê nêweşan cidî yê, vera tepişteyan îşkence zêdîya. Grevê vêşanîye resa roja 151. Ma pêvînayîş de nînan ser o qisey kerd.''

Ozsoyî da zanayene ke selahîyetdarê ke înan tede pêvînayîş kerd Tirkîya nêzdî ra teqîb kenê û vat: ''Înan zî zanayêne ke rexneyê ma estbî. Tewr peyên CPTyî Tirkîya zîyaret kerde la nêşi zîyaretê Abdullah Ocalanî. Pêvînayîşî ra verî ma tay persê ke avûkatanê Abdullah Ocalanî resnayî ma dayî selahîyetdaranê CPTyî. Nika grevê vêşanîye yo biidor dewa keno. Bi îxtîmalêkê pîlî metodê grevî do bivurîyo.''

Ozsoyî ard ziwan ke goreyê prensîbanê CPTyî tedeyîya pêvînayîşî nêna parekerdene la eşkera yo ke babetê pêvînayîşê înan çita yê. Ozsoyî vat: ''Tecrîd seba ma HDP rojdemo tewr verên o. Ma do pêvînayîşanê xo de tim na babete bikerê rojdemê xo yê verênî.''