Hemsereka Konseya Rayberdişî ya KCKyî Besê Hozat cewab da pesanê Meya Haber TVyî. Qiseykerdişê Hozate ra qismêk wina yo:

''Ez sere de serrneweyê Rayber Apoyî bimbarek kena. Heyetê pêvînayîşî vat rewşa Rayberîya hol a, moralê ci ca de yo. Ma pêro bi nê bîyî şa, şarê ma zaf bi şa. Na çarçewa de ez bi hurmet, heskerdiş û hesretê Rayberîya ma selam kena. Erjnayîşê ke ameyî kerdene zaf muhîm ê.  Pêvînayîşê verênî de Rayber Apoyî vatbi tecrîd dewam keno û eke şertê bêrê bedilnayene hêzê ci est o ke prosesê pêkewtişî biaçarno prosesê sîyasî û huqûqî. Nê pêvînayîşî de erjnayîşê dahîna hîrayî kerdî.

Ma heme nêeşkenê qala prosesêkî bikerê

Pîya bi nê pêvînayîşî ma hema zî nêeşkenê qala prosesêkî bikerê. Werte de prosesê çareserîye çîn o. Îmrali de hema tecrîd dewam keno. Şertê weşî, asayîş û cuyeya azade yê Rayber Apoyî nêameyî caardene. Hêrişê qirkerdişî yê vera kurdan nêameyî vindarnayene. Vakur de, Rojawan de her ca de, Başûr de hêrişê qirkerdişî yê girdî dewam kenê. Coka ma nêeşkenê nê prosesî ra vajê prosesê çareserî û haştîye. Ma nêzanê no proses reyna beno prosesê şerê taybetî  ya zî beno prosesê muzakere. Ma do nê pratîk de bivînê. Coka heta ke gamê mehkemî merê eştene çew nêeşkeno nameyê prosesî pano.

Ma nê sey kayê şerê taybetî vînenê

Îqtîdaro ke Rojawan de vera xopawitişê kurdan vejîyeno, cehd keno ke Îdareyê Xoserî tesfîye bikero, kurdan qir bikero, Tirkîya de senî meseleya kurdan çareser keno? Senî eşkeno samîmî nizdîyê çareserîya demokratîke ya meseleya kurdan bibo? Her ca de polîtîkayê înkar îmhayî, polîtkayê qierdişî dewam kenê. Nê semedî ra ma vanê ke no kayê şerê taybetî yo. Erdogan û Bahçelî têna qala çînkerdişê PKKyî û tesfîyêkerdişê Rojawanî kenê. Fekê înan ra têna qirkerdiş, merg, çînkerdiş, hêriş û şer vejîyeno.

Ma paştî danê îradeyê çareserîye yê Rayberîye

Rayberîye îradeyê çareserîye ramojna. No zaf muhîm o. Vat eke dewlete şertan bîyaro ca o hazir o ke gamanê pozîtîfan bierzo. Nê pêvînayîş no zelal ramojna. Veng dano muxalefetî. Heme hetanê sîyasîyan ra vano paştî bidê nê prosesî. Seba ke no proses bibo prosesê haştîye ganî her kes paşt bido ci. Ma zî paştî danê vengdayîşê Rayberîya xo. Ma paştî danê îradeyê çareserîye yê Rayberîya xo. Muzakerdoxo serkêş ê meseleyê kurdan Rayber Apo yo.

Rayber Apo semedê Tirkîya şanso peyên o

Ganî dewleta tirke, îqtîdar û muxalefetê ci pêro pîya îradeyê çareserîye ramojnê. Ganî dewleta tirke cewabo pozîtîf bido vengdayîşanê Rayber Apoyî û gamanê pratîkan bierzo. Eke Tirkîya de meseleya kurdan çareser nêba Tirkîya herême de zaf gird vînî kena.  Wa çew xo mexapîno. Tirkîya bena parçe parçe. Rayber Apo semedê Tirkîya şanso peyên o.Têgêrayîşê Azadîye yê Kurdan  şanso peyên ê Tirkîya yo. Eke Tirkîya meseleya kurdan çareser mekero û demokratîk mebo, Tirkîya o wext bena parçe. Ma Tirkîya hîşyar kenê, eke nê şansî meşuxulno do zaf gird vîn bikero.

Şarê ma wa têkoşînê xo xurtêr bikero

Ganî şarê ma û rayrapêroyîya demokratîke prosesî ra zaf çî mepawo û têkoşînê xo xurtêr bikero ke destê Rayber Apoyî hêzdar bikero. Têna bi têkoşînê topyekûnî ma eşkenê nê prosesî biaçarnê prosesê çarserîye. Semedê azadîya fîzîkîye ya Rayber Apoyî çareserkerdişê meseleya krudan ganî Hemleya Azadîye bêra xurtkerdene.

Ganî pêro kurdî semedê Rojawanî bibê yew

Rojawan de xoverdayîşo biheybet est o. Raşta zî şarê ma her ca de şerî rê, xoverdayîşî rê bi seferber. Xeta şerê şarê şorişgêrî de xover dano. No zaf bimana yo. Şar cayê QSDyî de, cepheyê şerî de ca geno. Xora teberê xoverdayîşî de semedê azadîye yewna rayîr çîn o. Ez xoverdayîşê şarê ma pîroz kena, selema kena. Raşta zî no zaf muhîm o, erjîyaye yo. Ganî no xoverdayîş dewam bikero û heme şarê ma û dostê ma paştî bidê ci.

Heta ke Îdareyo Xoser ê Rojawanî mero pawitene û azad mebo Vakurê Kurdîstanî de meseleya kurdan çareser nêbena. Vakur de zî eke çareserî mebo Îradeyo Xoser ê Rojawanî nêeşkeno payra bimano. Hinî meseleya kurdan bîya yew. Wayîrvejîyayîşê Şorişê Rojawanî wayîrvejîyayîşê estbîyayîş û azadîya şarê ma ya. Coka ganî sere de Vakurê Kurdîstanî çar parçeyanê Kurdîstanî û teberê welatî bi mîlyonan kesî vejîyê kuçeyan û paştî bidê Şorişê Rojawanî.''