Mudiro Pêroyî yê rojnameyê Agosî Hrant Dînk serrgêra qetilkerdişê ya 15. de cayo ke tede ame kiştene de ame vîrardene. Rixmê jan û serdî bi embazê Dînkî, wekîlê HDP û CHPyî, Mayê Şemeyî û xeylêk temsîlkarê partîyanê sîyasîyan û rêxitinanê komelê sîvîlî û hezaran kesî tewrê yadkerdişî bîyî.  

Verê yadkerdişî polîsan kuçeyê banê verênî yê Agosî girewt binê abluqa û nuqtayê cigêrayîşî nayî ro. Banî sero pankarta ''15 serrê kêmî'' ameye daliqnayene û verê berî de vilîkî ameyî ronayene û mûmî ameyî tafînayene. Cayê yadkerdişî de vengê deyîra Sari Geline biberz. Yadkerdişî bi rêzgirewtişî dest pêkerd û dima ra qiseykerdişê Hirant Dînkî ame goştarîkerdene. Dima ra Rakele Dînk qisey kerd.

Rakele Dînke ard ziwan ke vengê Hirant Dînkî hema goşê aye de yo û vat: ''15 serrî ravêrtî. 15 serrê kêmî. Çutagim 15 serrî ravêrtî ke ti pê guleyanê ke peyra erzîyayî to ma ra ameyî girewtene. Gama ke to semedê şarê xo gurîyayêne, sey xayînî ameyêne sûcdarkerdene la înan bi xo xayînîye kerd peyra da to ro. 

Ma berpirsîyarîya xo nêanê ca û heme probleman erzenê milê domananê xo. Ma domanan û ciwnana şawenê cephe.  Eke no mîrasê ma yo gonîn ra nêbîyenî ê eşkayêne sey heme embazanê xo yê dinya yewna ameyox xeyal bikerê û bîyarê ca. Ma hema do çi erdlerzan bivînê. Wa no mifteyo dejin ê ravertoxî bêro akerdene ke ruhê dejnaye azad bê. Na dinya çi zorbayî zalîmî dîyî, roje ameye pêro rijîyayî. Dewrî bedilyayî. Ma ameyî xapînayene, domanî şima mexapîyê.

Her vengê nêrazîbîyayîşo ke na herre de vejîya sey hêzanê teberî name kerdî. Xoverdayîşê Gezî de ciwananê ma bajarê xo pawit. Domanê ma sey 'teror' name kerdî. Domanî ameyî qetilkerdene. Kam teror keno? Nika sey xapînayîşî muhakeme kenê. Neheqîye karê şima yo. Çutagim ti tim vera terorî vejîyayî. Sey verî tî ra pey zî kam ke hêz fîneno dest zulm keno. Dostê ma bîlasebeb zîndanan de yenê tepiştene. Avûkatî girewtî, rojnamegerî girewtî, sîyasetmedarê kurdan guretî. Wazenê ke wa çekî qisey bikerê, merdimî qisey mekerê.

Rixmê heme kerdişanê înan vengê serewedaritiş û nêrazîbîyayîşî ke cenazaya to de tîya bi berz hiş nêkerd do nêkero.  Karkerî, ciniyî, wendekarî û dewijî reyna têkoşîn kenê, wayîrê heqanê xo vejîyenê.  Rojêke do reyna bibê yew û sey salerî biherikîyê. Tayî zerşikteyê. Vanê 'gama ke mi rê bi şima ça de bî?'  Ma nêweşat wina bikerê, heta ke destê ma ra bêro ma veng danê venganê bînan. Vengê to goşê ma de yo. Sozê ma soz o.''