Şaristanê Den Haagî yê Hollanda de Têgêrayîşê Cinîyan ê Kurdan ê Hollanda (TJK-H) derheqê serebûtanê peyênan ê sîyasîyan de panelêk serûber kerd. Wekîla HDPyî ya Îstanbulî Huda Kaya panel de tewra panelî bîye.

Huda Kaya da zanayene ke îqtîdarê AKP-MHPyî Tirkîya pê teda îdare keno û vat: ''AKPyî pê dîndarîyêka sexte Tirkîya kerda cehenem, paştî xo daya ala û Quranî û merdimî talan kerdê.  Îqtîdarî bodrumanê Cizîre de kredîya xo qedînaya. Tirkîya de sey SADATî xeylêk hêzê paramîlîterî yê AKPyî estê. Artêşa paralele ya esase Qesr a.''

Huda Kaya ard ziwan ke peynîya îqtîdarê zulmî yê AKPyî ameya û vat: ''Ma zanenê ke ê do kerdişanê xo ra bêrê muhakemekerdene. Şarê ma do lapatêkî bido înan ro.''

Huda Kaya ewro saete 13.00 de beşdara panelêkê bînî yê Merkezê Komelê Demokratîkî yê Kurdan ê Den Haagî biba.