Endama MAF-DADî û avûkate Rengîne Ergul derheqê tecrîdê giranî yê vera Rayber Apoyî de ANFyî rê qisey kerd.

Rengîne Ergul îfade kerd ke şuxilnayîşê heqê hêvîye ganî bi şertan îfadekerdene û vat: ''Mehkemeya Heqanê Merdiman a Ewropa (MHME) derheqê heqê hêvîye de îçtîhatêk îfade kerdbi. MHME bi 'Bira Ocalanî-2'yî Tirkîya mehkum kerdbî û waştbî ke cade heqê hêvîye bîyara ca. Na bire 2015 ra nata rojdemê Komîteya Wezîran a Konseya Ewropa de ya. Komîteya Wezîran zî MHME zî venga Tirkîya dabî ke qanûnanê xo wa bivurna û muebedî wedarna.  

A raşte hukmatê Tirkîya bi rayîrê MHPyî qebul kerd ke Abdullah Ocalan yeno tecrîdkerdene, seba azadîya Ocalanî vurîyayîşê qanûnan lazim o. Ancî hukmatê tirkî bi qiseyanê Bahçelîyî qebul kerd ke tecrîd qedexe yo û ê heqê hêvîye asteng kenê. Seba ke heqê hêvîye qanûnanê Tirkîya de nuşte nîyo ganî seba ney bernameyêk virazîyo. Goreyê bira Komîteya Wezîran ganî Tirkîya heta êlula 2025î heqê hêvîye bîyara ca, seba ney qanûnanê xo viraza.''

Rengîne peynîya qiseykerdişê xo de îfade kerd ke seba ke Tirkîya goreyê qanûnanê xo têbigêra, tecrîdî wedarna û neçare bimana ke prosesêkê viraştişê qanûnan bikera ganî komelo sivîl her warî de têkoşînî pîlêr bikero.