Wekîlê DEM Partî yê Çewlîgî û Avûkat Omer Faruk Hulakuyî derheqê rewşa zîndanan û tecrîdê vera Rayber Apoyî de ANFyî rê qisey kerd.

Hulakuyî da zanayene ke cezaya muebedeya girankerde Tirkîya dîyena tepişteyanê sîyasîyan û sey hacetêkê teda û kontrolkerdişî şuxilîyena. Hulakuyî pare kerd ke bi na ceza yeno waştene ke tepişteyê sîyasîyî hêvîya azadîye ra fek vera bidê sey 'merdeyan' bibê ke na noqta de 'heqê hêvîye' vejîyayo werte. Hulakuyî vat: ''Tecrîdê vera Birêz Ocalanî tewirê sîstemê ceza yê Tirkîya yê vera tepişteyanê sîyasîyan eşkera keno. Teyna sey heqêkê sexsîyî ney heman wextî de seba awankerdişê edalet û haştîya komelkîye heqê hêvîye hewce yo. Caardişê nê heqî, sereraştkerdişê heqanê merdiman, newe ra ercnayîşê cezaya muebede yo.''

Hulakuyî dîyar kerd ke seba ke tepişteyê nêweşê giranî vera nêdîyenê heqê merdiman û huqûq bi giranî yenê binpaykerdene. Hulakuyî vat: ''Heqê hêvîye paştîya xo heqanê merdiman û hûrmetê bi rûmetê merdimatîye ra gêno. Tepişteyê nêweşî nênê tedawîkerdene û îhtîyacanê xo yê bingeyînan ra bêpar manenê. Na rewşe hem dûştê qedexeyê îşkenceyî ya hem zî binpaykerdişê heqan o. Tepişteyanê nêweşan rê merg yeno ferzkerdene. Ganî qanûnanê mehkumîyetî de reformê pîlî bêrê kerdene.''

Hulakuyî da zanayene ke vera rîskanê asayîşî û weşîyê tepişteyan, seba pawitişê heqanê bingeyînan ganî nê gamî bi lezî bêrê eştene:

* Seba caardişê heqê weşîye ganî komîsyonê weşîye yê xoserî bêrê awankerdene û tepişteyê nêweşê giranî vera bidîyê.

* Şert û mercê zîndanî wa bêrê holkerdene, tecrîd û îzolasyonî wa biqedê.

* Sîstemê înfazê ceza de krîterê heqanê merdiman wa bêrê caardene, prosesê huqûqî ganî şefaf û edîl bibê.

* Sereraştkerdişê şert û mercanê asayîşî û pêşkêşkerdişê îmkananê weşîye yê zîndanan, bi sereraştkerdişê waran do hem heqê cuya rûmetêne hem zî bingeyê edaletê komelkîyî wa bêrê xurtkerdene.

* Kontrolkerdişê zîndanan hetê komîsyonanê xoseran û nêzdîbîyayîşê edîlî wa bêrê kerdene.