Hulkî Guneş (60) o ke 32 serrî zîndan de mend û tehlîyeya ci xeylêk reyî ameye astengkerdene bado ke avûkatê ci muracatê Mehkemaya Bingehî kerd ame tehlîyekerdene.

Guneş dewa Qerqerûtî ya qezaya Gimgimî ya Mûşî de bi hewayêkê qirseyî, bi tîlîlîyan û çapikan, def û zûrna ame pêşwazîkerdene. Dayîka ci Zekîye Guneş (98) zî rixmo ke bizorî wirzena lingan ser bi çapikan şîyî vera lajê xo. Şarî bi saetan bi tîlîlîyan govende girewt.

Guneşo ke zîndan de pê xeylêk nêweşîyan kewt zîndanê Mûş, Amed, Tekirdag û tewr peynî de Zîndanê Aliaga yê Îzmîrî de ame tepiştene.

Birayê Guneşî, Yakup Guneş zî badê 30 serran par amebi tehlîyekerdene.