Enstîtuyê Cigêrayîş û Zanîstî ya Kurdan  bi wesîleya 15ê Gulane Roşanê Ziwanê Kurdkî mesajê pîrozkerdişî pare kerd û bale ante tehlukeyê serê kurkdî ser.

Mesaj de nê ameyî parekerdene: ''Her netewe bi ziwanê xo yena naskerdene û namekerdene. Netewa ke ziwanê xo vînî bikero nasnameyê xo zî vînî keno. Verî ziwan bi dengbêkan, hîkaye û edebîyatkaran ganî mendêne. Despêkê seserra 20. de dezgeh û rojnameyan de kurdkî ameye şuxulnayene ke bêro pawitene û bibo ziwano edebî.

15ê gulana 1932yî de binê îdareyê Celadet Alî Bedirxanî de Şam de bi herfanê latînan Kovara Hawarî ameye vetene. KNN zî bi nê famî û berpirsîyarîye kombîyayîşê xo yê 2009î de 14,15 û16ê gulane sey Roşanê Ziwanê Kurdkî îlan kerd.  No qeraro qiymetin hetê zafê kurdan ra ame qebulkerdene.

Çi heyf ke Vakurkê Kurdîstan û teberê welatî de şarê ma vera ziwanî hîsgêr tênêgêreno. No zî sey felaketa girde vejîyeno verê ma. Wa no zaf hol bêro zanayene ke  eke qicê yew şarî ziwanê dayîke qisey mekerê ameyoxê înan çîn o. Ma hêvî kenê ke pêro kurdî her warê cuye û perwerdeyî de bi hîssê berpirsîyarîya netewe wayîrê ameyoxê ziwanê kurdkî bivejê û her warê cuye bibo kurdkî.

Wa şarê ma kurdkî qisey bikero, kurdkî binuso, kurdkî biwano, kurdkî bifikîrîyo, kurdkî biciwîyo! Gerek ma her şert de wayîrê ziwanê xo bivejê!''