Şêx Seîd û 46 embazê ey 29ê hezîrana 1925î de Berê Koyî de, Amed de ameybî dardekerdene. Serrgêra 100ine ya dardekerdişê înan de Şêx Seîd û embazê ci Meydanê Berê Koyî de ameyî yadkerdene.

Yadkerdiş de Hetkarê Serekê Komeleya Şêx Seîdî Ramazan Ariyî qisey kerd û pare kerd ke Şêx Seîdî û embazanê ey temsîlkarîya heq, edalet û rûmetê kurdan kerdibî. Ey vat: ‘’Ma wazenê ke cayê goranê înan bêro eşkerakerdene û nê qirkerdişî de dewlete têrî biba. Haştîya mende bi caardişê edaletî mumkîn a. Ma wazenê bi nasnameyê xo biciwîyê.’’

Mele Suleyman Kurşunî zî îfade kerd ke Şêx Seîdî û embazanê ey zerrîya şarê kurdî de cayê  xo girewto.

Serekê Komeleya Şêx Seîdî û tornê Şêx Seîdî Kasim Firatî ard ziwan ke dewlete hema zî înkarê kurdan rê dewam kena û vat: ‘’Wa cayê goran bêrê eşkerakerdene, cenazayî teslîmê keyeyan bêrê kerdene.’’

Vervatoxê Înîsîyatîfê Yewîya Demokratîke Mehmet Kamaçî vat: ‘’Şêx Seîd û embazê ey rayberanê kurdan ra bîyî. Şarê kurdî do înan xo vîr a nêkero. Wext wextê yewîye yo.’’

Serekê PSKyî Bayram Bozyelî yadkerdiş de Şêx Seîd û embazê ey yad kerdî.

Çalakîye bi rayraşîyayîşê bêvengî qedîyaye.