Şaristanê Kolnî yê Almanya de Înîsîyatîfê Hunermend û Roşnvîran ê Demokratîkî bi kombîyayîşêkî vera hêrişanê dewleta tirke yê sera Rojawan û Başûrî, bêvengîya PDKyî ya serê hêrişan û hemkarîya PDK-dewleta tirke deklarasyonêk weşana.

Wekîlê HDPyî yo verên Lezgîn Botan, hunermendî, nuştox û roşnvîrî tewrê kombîyayîşî bîyî. Kombîyayîş de Komployê 9ê Teşrîna Verêne yê vera Rayberê Şarê Kurdî Abdullah Ocalanî ame şermezarkerdene.

Hêverî eşkerayîye ameye wendene. Eşkerayîye de  ame parekerdene ke dewleta tirke qestî ra serrgêra Komployê 9ê Teşrîna Verêne de hêrişê Rojawanî kena û hêrişan de warê sivîlan, binawanî û merkezê xizmetî yenê hedefkerdene. Eşkerayîye de ame îfadekerdene ke PDKyî çalakîya fedayî ya vera Wezîrîya Karanê Zereyî şermezar kerda la vera hêrişanê dewleta tirke yê serê Rojawan, Mexmûrî û Şingalî bêveng o. Eşkerayîye de venga hunermendi roşnvîranê kurdan û şarê kurdî dîya ke vera tecrîdê Îmraliyî vengê xo berz bikerê û waran debikerê.

Dima hunermende Bermale Çem deklarasyon wend. Deklarasyon de îxanetê PDKyî ame şermezarkerdene û wina ame vatene: ''Ma ganî vera hemkarîya PDK û dewleta tirke tewirê xo bi zelalî bimojnê. Ma sey hunermendan sey vizêrî ewro zî dewaya azadîye de hetê şarê ma de yê û ma do vera pêro hemkaranê dişmenî vinderê. 

Heyf ke PDK hêrişanê vera gerîlayan de hetê dewleta tirke de cagêno û rayîr dano ke dewleta tirke Başûr de welatperweran qetil bikero.  Hunermend û roşnvîranê kurdan çend reyî venga terefan dabi ke seba yewîya neteweyîye têbigêrê. PDKyî qetî goş nêda nêvengdayîşan û tim xizmetê polîtîkayanê AKP-MHPyî kerd. No tewirê PDKyî qetî nêno qebulkerdene. Ma venga şarê Başûrî û pêşmergeyan danê ke mebê hemkarê îxanetê PDKyî û vera îşxalkeran bi zelalî têbigêrê. Ma do heta peynî vera îxanetî têbigêrê û têkoşînê azadîye berz bikerê.''