Hunermendanê çar parçeyanê Kurdîstanî Xelîl Xemgîn, Nasir Rezazî, Beser Şahîn, Nebez Abdullah, Yelda Abbasî, Şazad û Fatemeh Îsmaîliyan derheqê hêrişanê îşxalî yê dewleta tirke de ANFyî rê qisey kerd. Înan vat vera hêrişanê îşxalî yê dewleta tirke ganî ê gerîlayan reyde ca bigêrê û venga her kesî da ke pê erkê xo têbigêro.

Xelîl Xemgîn: No şer şerê estbîyayîş û nêbîyayîşî yo. Ma vera dişmenî ganî yewîya xo xurt bikerê, gerîlayan hetî de nê şerî de ca bigêrê. Tay partîyê ke hetê gerîlayan de nîyê, wa bizanê ke eke dişmen ser bikewo, cuye do nêmana. Ganî kurdî mîyanê xo de şer aver nêberê û vera dişmenî bibê yew. Dewleta tirke wazena pêro kurdan qir bikera. No şer vera pêro destkewteyanê kurdan o. 

Nasir Rezazî: Armancê dewleta tirke eşkera yo. Nika Başûr de tewr tay 500 dewî hetê dewleta tirke ra ameyê vengkerdene, şar dîya koçkerdene. Eke ma yew bibê dişmen nêeşkeno wina bikero. Ganî pêro kurdê rûmetênî vera nê îşxalî wayîrê tewirêkî bibê, Kurdîstanî bipawê, şarê xo bipawê. 

Besere Şahîn: Kurdîstan dadîya ma ya, gerîlayî domanê ma yê. Ez venga pêro dadîyanê Başûrê Kurdîstanî dana ke wa rayîr nêdê dişmenî, meverdê domanê înan vera gerîlayan şer bikerê. Na safha safhayêka zaf tehlukeyîn a. Ez pê bawer a ke şarê ma do kayanê dişmenî pûç bikero. Ganî şarê ma her cayê dinya de mesuldarîya xo bigêro xo milî û bêveng nêmano.

Nebez Abdullah: Roj roja karî ya, roja têgêrayîşê vera dişmenî ya. Ma venga pêro hunermend, roşnvîr û azadîgîran, aktîvîstan û hemwelatîyanê Başûrî danê ke wa roja winayêne de vengê xo vejê. Nê hêrişî têna vera PKKyî nîyê vera pêro kurdan ê. Ganî ma nê prosesî de baldar binê. Wa pêşmergeyê welatperwerî vera gerîlayan şer mekerê. 

Yelda Ebbasî: Çend serrî yo Tirkîya vera kurdan şer kena û bi hezaran merdimê kurdî benê qurbanê nê şerî. Ez wazena ke wa şer biqedo. Ez hêvî kena ke seba şarê kurdî rojê weşî do bibê.

Şazad: Wa hunermend, roşnvîr û nuştoxê Başûrî pîya verê îşxalê Başûrî bigêrê. Gerîlayî û PKK wayîrê erkê pawitişê kurd û Kurdîstanî yê la armancê înan têna gerîla û PKK nê çinkerdiş, wêrankerdiş û qirkerdişê kurdan o. Serekê Herême, Serekwezîrê Herême, Keyeyê Barzanîyan wa bizano ke binkewtişê gerîlayan yeno manaya binkewtişê Kurdîstanî. Ez hêvîdar a ke kurdî do yew bibê û vera îşxalî pîya vinderê.

Fatemeh Îsmaîliyan: Şer armancê şarê azadîgîrî nîyo, armancê dîktatoran o. Rejîmê tirkî bi serran o hêrişê kurdan keno. Her roje bi hacetanê cîyayan cayêkê Kurdîstanî de şer keno, gonîye rijneno. Ez sey cinîyêka Xorasanî vana ke şer û cengî rê ney. Wa domanê kurdî nêkişîyê.