Hêrişê dewleta tirke yê vera Herêmanê Pawitişî yê Medya dewam kenê. Hunermendanê kurdan vera hêrişan nêrazîbîyayîşê xo mojna û venga şar û hêzanê kurdan da ke vera dewleta tirke tewirêkê hemparî bimojnê.

Hozane Canê: Ma vera hêrişan dest bidê destî, yewîya xo awan bikerê û nê şerê gemarinî vindarnê. Wa gonîya gerîlayan merijîya. Erdogan wazeno bi gonîya kurdan armancanê xo bîyaro ca. Ez venga pêro kurdan dana ke yewîya xo awan bikerê, pê kayanê Erdoganî mexapîyê û rîca kena ke gerîlayan têna meverdê. 

Ganî Nar: Herinda ke ma sey kurdan binê neteweyêka yewbîyaye û seba azadîye bixebitê heyf ke ma ra tay kesî mîyanê kayanê dişmenanê Kurdîstanî de ca gênê. Ma heta key destkewte û serkewtişanê xo do bikerê qurbanê dişmenî? Hînî bes o ke ma bi destê xo jehrê dişmenî wenê.

Hoşyar Heme Ferec: Aseno ke qetî Tirkîya nêkena ke meseleya kurdan bi dîyalogan çareser bikera. La ganî ma bizanê ke hêz û neteweya kurdan eşkenê wayîrê ziwan, heq û kulturê xo vejîyê. Destpadayîşê beşêkê erdê Kurdîstanî destpadayîşê pêro kurdan o. Serkewtiş do bibo ê kurdan. 

Necmedîn Xulamî: Pêro operasyonê vera PKKyî do bênetîce bimanê. Ma nê hêrişan bi xurtî şermezar kenê. Hukmatê Tirkîya, AKP dişmeno sereke yê kurdan o, têna dişmenê PKKyî nîyo. Ez şarê kurdî û bi taybetî şarê Başûrî ra wazena ke vera nê hêrişan hişyar binê.Wa hêzê Kurdîstanî mebê hemparê nê hêrişan. 

Hêmin Nanobeat: Dişmen ma rê yew ziwan, yew ala û yew nasnameyî ferz keno. La ma sey kurdan çira nêbenê yew? Ez pêro rêxistinanê sîyasî, hêzanê sîyasîyan ra rîca kena ke menfaatê kurdan medê destê kesî, xizmetê şarê xo bikerê.

Hozan Aydin: Heyf ke PDK paştî dano nê hêrişan. PKK 40 serrî yo her parçeyê Kurdîstanî de seba kurdan têkoşîn keno. Gerîlayî çeperan de namus û rûmetê kurdan pawenê. Ma eşkenê bi wayûbiratîya xo heqê zulmê xayînan û dişmenî ra bêrê. Se beno wa bibo ma do tim hetê gerîlayan de bibê.

Nahîde Fetahî: Wa hunermend, hunerhez û şarê Kurdîstanî vera rejîmê faşîstî yê tirkan bêveng nêmanê. Ez hêvîdar ê ke kurdî yew bibê û vera hêrişanê îşxalî bêveng nêmanê. Erkê ma yo ke ma vera îşxalkeran bibê wayîrê tewirêkî. 

Farûq Bapîr: Dewleta tirke wazena erdê Kurdîstanî îşxal bikera. Ganî kurdî û pêro kurdîstanijî vera nê hêrişan tewirê xo bimojnê. Ma hêrişanê dewleta tirke şermezar kenê. Serkewtiş bibo ê kurdan, gerîlayî û pêşmergeyî tim do ser bikewê. Xayîn û dişmenî tim do bişikîyê.