Wekîla HDPyî ya verêne Sîbele Yigitalpa ke nika mecbur menda ke teberê welatî de bicîwiyo ard ziwan ke Tirkîya bi hûmara zîndanan û tepişteyan Ewropa de yewin a û vat emser do 18 zîndanî bibê 384 zîndanan ser û yeno plankerdene ke heta 2024î 40  heb zîndanê bînî bêrê viraştene.

Yîgîtalpe vist vîrî ke tewr tay se tepişteyê kurdê ke cezaya înan qedîyaya rixmê naye înfazê înan ameyî vêşnayene û tehlîyeyê înan ameyî peydeeştene û vat: ''Tpişteyan rê îtîrafkarîye yena ferzkerdene.'' Yigitalpe ard ziwan ke demê peyênî yê 2021î de 7 tepişteyan dinyaya xo bedilnaye û vat: '2Tewirê mergî, badê mergî zîndanî ra vetişê û definkerdişî ra yeno vînayene ke na polîtîkaya îqtîdarî ya û nê mergî normal nîyê.''

Yîgîtalpe vat: ''Tepişteyê nêweşî mergî rê ameyî caverdayene û dima ra vanê merde ameyî dîyene. Tepişteyê ke 24 saetî bi kamerayan yenê teqîpkerdene, raştê şîdetê sîstematîkî yenê, raştê zextê psîkolîkî yenê merde nînê vînayene, yenê mirnayene. Heme heqê tepişteyanê nêweşan ê giranan destê înan ra yenê girewtene û destûr nêdîyeno ke rojanê xo yê peyênen teber de ravêrnê. Eslê xo de pê kerdişanê xo verê mergî akenê.  Dima ra dosyayan nimnenê û zanayîş nêdanê. Sîyasetmedara kurde Aysele Tugluk rixmê nêweşîya xo ya girane rehîne yena tepiştene. Na polîtîaya ke şexsê Tugluke de yena rayraberdene linga dişmenîya vera kurdan ê îqîtîdarî ya zîndanan a. Îqtîdar vera sîyasetê legalî yê kurdan tepişteyan sey rehîneyan vîneno, her xoverdayîşê kurdan de hêrişê tepişteyan keno, mirneno, wesayîtê cenaza nêdano, heta nêverdeno cenazayî bêrê kefenkerdene. No caardiş huqûqê dişmenîye ra zî wetêr o. Vera ma de îqtîdarêk esto ke bêhuqûqîye de qet yew sînor nas nêkeno. Ganî ma semedê tepişteyan hîsgêr bo û rêxistinkerde têkoşîn bikerê.''