Sîyasetmedar û huqûqnas Cebbar Leygarayî dewaya qefilnayîşê HDPyî ser o qisey kerd û vat: ''Mabênê HEP û DTPyî de tewr tay 25 serrî estê. Eke merdimi bala xo bidê ser vînenê ke pêro bahane û birê qefilnayîşî seyci yê.''
Sîyasetmedar û huqûqnas Cebbar Leygarayî dewaya qefilnayîşê HDPyî ser o ANFyî rê qisey kerd.
Leygarayî ard ziwan ke mezgê mehkemeya xosere hînî nêmendo, dadger û dozgerî tersenê ke şewêke nişka ra bitepişîyê. Leylagaryî vat: ''Avûkatê ke mîyanê AKPyî de serekîya şaristanî kerdêne yan zî îdarekar bîyêne pêro bîyî dadger û dozger. Coka pê reformê mehkeme bawerî nêmenda. Hînî yew garabtîya partî, waqf, sendîka yan zî komeleyan nêmende. Pêroyînan rê qeyûm yeno tayînkerdene. Êyê ke medyaya dîjîtale ser o çîyêk pare kenê tepişîyenê. Rewşa winasêne de xora merdimî pê qala reformî bawer nêkenê.''
Leygarayî bale ante dewaya qefilnayîşê HDPyî ser û pare kerd ke HEPî ra nata dewlete de kulturêkê qefilnayîşê partîyan esto. Leygarayî vat: ''HEP, DEP, HADEP, DEHAP û DTP ameyî qefilnayene. Biranê qefilnayîşê nê partîyan de tim fikro sîyasî serdest bi labelê bahane û birê qefilnayîşî tim seyci bîyî. Qanûn de yeno vatene ke tirkan ra ber şarê bînî wa mîyanê neteweya serdeste de ameyî helînayene. Yanî ameyî asîmîlekerdene. Seba ke HDP kokê xo nêterikna xo aver berd hende maruzê nê tedayan bi. HDP vurîyayîşê îdareyê Tirkîya de wayîrê rolêkê pîl o. Coka vera ci dewa ameye akerdene.''
Leygarayî da zanayene ke bingeyo komelkî yê kurdan ê HEP, DEP, OZDEP û DTPyî hema zî herinda xo de yo û vat: ''Mumkîn nîyo ke no binge bêro çinkerdene. HEPî bi se ra 4.2ê rayan dest pêkerd. Niha rayê HDPyî se ra 13 ê. Rewşa komelkî û cografya nênê dîyene. Na cografyaya qedîme de tarîxêk esto. Çew nêeşkeno pê tay nuşteyan nauye çin bikero.''
