Huqûqnasî seba tepişteya nêweşe Aysele Tugluk verê Edlîyeya Îstanbulî ya Çaglayanî de ameyî pêser. Dima înan eşkerayîye daye. Sereka Konseya Merkezî ya Yewîya Tabîbanê Tirkan (TTB) Prof. Dr. Şebneme Korur Fîncanci, Hetkarê Serekê Yewîya Baroyanê Tirkîya (TBB) Gurkan Altun û endamê Komeleya Huqûqnasan a Seba Azadîye (OHD) zî tewrê eşkerayîye bîyî.

 Huqûqnase Mebuse Tekay da zanayene ke Tugluke endama Baroyê Îstanbulî ya la Baroyê Îstanbulî babete de bi hîsgerî tênêgêreno. Tekaye vat: ''Ganî Tugluke bêra veradayene. Mehkemeya Heqanê Merdiman a Ewropa (AÎHM) zî bire daye ke bira wedarnayîşê heqê destpanêdayîşî yê wekîlanê HDPyî de binpaykerdiş esto. La bire nêna caardene.''

Şebneme Korur Fîncanci îfade kerd ke Dezgehê Tipê Edlîyî nêverdeno tepişteyê nêweşî vera bidîyê û dezgehî Aysele Tugluk ser o raporêko bêzanist amade kerdo. Fîncanciye vat: ''Ganî ma pîya vera na bêhuqûqîye vinderê, dest bidê destî. Na mesele meseleyêka komelkî ya.''

Gurkan Altunî bale ante ser ke raporê Dezgehê Tipê Edlîyî goreyê zanistî nîyo û rixmê raporê bînî yê 7 doktoran zî Tugluke vera nêdîyaya.